കോട്ടയം: ഇന്ന് അവതരിപ്പിച്ച സംസ്ഥാന ബജറ്റിൽ കേരളത്തിലെ റബർ കർഷകരെ സർക്കാർ പൂർണ്ണമായും അവഗണിച്ചതായി ചെറുകിട കർഷക ഫെഡറേഷൻ സംസ്ഥാന പ്രസിഡന്റ് സന്തോഷ് കുഴിവേലിൽ ആരോപിച്ചു. റബറിന്റെ തറവില വർദ്ധിപ്പിക്കുന്നതടക്കമുള്ള സുപ്രധാന പ്രഖ്യാപനങ്ങൾ ഈ ബജറ്റിൽ ഉണ്ടാകുമെന്ന് കർഷകർ ഏറെ പ്രതീക്ഷിച്ചിരുന്നു. എന്നാൽ കർഷകരുടെ ദുരിതം കാണാതെ പോയ ബജറ്റിൽ റബർ മേഖലയ്ക്കായി യാതൊരു നീക്കവും ഉണ്ടായില്ലെന്ന് അദ്ദേഹം കുറ്റപ്പെടുത്തി.
വിലയിടിവും ഉൽപ്പാദനച്ചെലവും കാരണം പ്രതിസന്ധിയിലായ റബർ കർഷകരെ സഹായിക്കുന്നതിൽ സംസ്ഥാന ഗവൺമെന്റ് പരാജയപ്പെട്ടതായും, ഈ അവഗണന കർഷകരോടുള്ള വെല്ലുവിളിയാണെന്നും സന്തോഷ് കുഴിവേലിൽ പ്രസ്താവനയിലൂടെ ചൂണ്ടിക്കാട്ടി.
