ഡാളസ്: 2026 ഫിഫ ലോകകപ്പിന്റെ സെമിഫൈനലിൽ കരുത്തരായ ഫ്രാൻസിനെ തകർത്ത് സ്പെയിൻ കലാശപ്പോരാട്ടത്തിന്. ഡാളസിൽ നടന്ന ആവേശകരമായ മത്സരത്തിൽ എതിരില്ലാത്ത രണ്ട് ഗോളുകൾക്കായിരുന്നു സ്പെയിനിന്റെ വിജയം.
മത്സരത്തിന്റെ ഇരുപകുതികളിലുമായി മികേൽ ഒയാർസബാലും പെഡ്രോ പോറോയുമാണ് സ്പെയിനിനായി ഗോളുകൾ നേടിയത്. 2010ന് ശേഷം ആദ്യമായാണ് സ്പെയിൻ ലോകകപ്പ് ഫൈനലിൽ പ്രവേശിക്കുന്നത്.
മത്സരത്തിന്റെ 20-ാം മിനിറ്റിൽ ലൂക്കാസ് ഡിഗ്നെ ലമീൻ യമാലിനെ ഫൗൾ ചെയ്തതിനെ തുടർന്ന് സ്പെയിനിന് അനുകൂലമായി പെനാൽറ്റി ലഭിച്ചു. കിക്കെടുത്ത മികേൽ ഒയാർസബാൽ പന്ത് വലയിലെത്തിച്ച് സ്പെയിനിന് ലീഡ് സമ്മാനിച്ചു. ഗോൾ വഴങ്ങിയതിന് പിന്നാലെ ഫ്രാൻസിന് തിരിച്ചുവരാൻ കഴിയാതെ പോയി.
രണ്ടാം പകുതിയിൽ റൈറ്റ് ബാക്ക് പെഡ്രോ പോറോ സ്പെയിനിന്റെ ലീഡ് ഇരട്ടിയാക്കി. ഇതോടെ മത്സരം ഫ്രാൻസിന്റെ കൈവിട്ടു. കിലിയൻ എംബാപ്പെ, ഉസ്മാൻ ഡെംബലെ, മൈക്കൽ ഒലീസെ തുടങ്ങിയ താരങ്ങളെ ഫലപ്രദമായി തടഞ്ഞുനിർത്താൻ സ്പെയിൻ പ്രതിരോധത്തിന് സാധിച്ചു.
ആദ്യ പകുതിയിൽ തന്നെ ഫ്രഞ്ച് പ്രതിരോധത്തിലെ പ്രധാന താരമായ വില്യം സാലിബ പരിക്കേറ്റ് പുറത്തുപോയത് ടീമിന് തിരിച്ചടിയായി. ഈ ലോകകപ്പിൽ ആദ്യമായാണ് ഒരു മത്സരത്തിൽ ഗോൾ നേടാനാകാതെ ഫ്രാൻസ് പുറത്താകുന്നത്.
ഇംഗ്ലണ്ട്-അർജന്റീന സെമിഫൈനൽ മത്സരത്തിലെ വിജയിയെയാണ് സ്പെയിൻ ഫൈനലിൽ നേരിടുക.
അതേസമയം, ലോകകപ്പ് ചരിത്രത്തിൽ പുതിയൊരു റെക്കോർഡും സ്പെയിൻ സ്വന്തമാക്കി. ലോകകപ്പ് സെമിഫൈനലിൽ ആദ്യ ഇലവനിൽ ഒരേസമയം രണ്ട് കൗമാര താരങ്ങളെ ഉൾപ്പെടുത്തി കളിച്ച ആദ്യ ടീമായി സ്പെയിൻ മാറി. ലമീൻ യമാലിനൊപ്പം പാവ് കുബാർസിയും ആദ്യ ഇലവനിൽ ഇടം നേടിയതോടെയാണ് ഈ നേട്ടം സ്വന്തമായത്. പരിശീലകൻ ലൂയിസ് ഡി ലാ ഫ്യൂന്റെ യുവതാരങ്ങളിൽ വിശ്വാസം അർപ്പിച്ചാണ് നിർണായക മത്സരത്തിൽ ഈ തീരുമാനം കൈക്കൊണ്ടത്.
