കോഴിക്കോട്: 68-ാമത് സംസ്ഥാന സ്കൂൾ കായികമേളയ്ക്ക് ഇന്ന് കോഴിക്കോട് തുടക്കമാകും. വടക്കൻ കേരളത്തിൽ മഴ ശക്തമാകുമെന്ന ആശങ്ക നിലനിൽക്കുന്നതിനിടെയാണ് കായികമേളയ്ക്ക് തുടക്കമാകുന്നത്. വൈകിട്ട് നാലിന് മുഖ്യമന്ത്രി വി.ഡി. സതീശൻ മേള ഉദ്ഘാടനം ചെയ്യും. സ്വർണക്കപ്പ് ഘോഷയാത്രയും ദീപശിഖാ പ്രയാണവും കോഴിക്കോട് ബീച്ചിൽ സംഗമിക്കും. മത്സരങ്ങൾ നാളെ ആരംഭിക്കും.

കായികമേളയിൽ പ്രായത്തട്ടിപ്പും ഉത്തേജക മരുന്നുകളുടെ ഉപയോഗവും തടയാൻ കർശന നടപടികൾ സ്വീകരിക്കുമെന്ന് വിദ്യാഭ്യാസ മന്ത്രി എൻ. ഷംസുദ്ദീൻ അറിയിച്ചു. പരാതികൾ ലഭിച്ചാൽ ബോൺ ടെസ്റ്റ് ഉൾപ്പെടെയുള്ള പരിശോധനകൾ നടത്തും. മഴ കാരണം മത്സരങ്ങൾ തടസ്സപ്പെട്ടാൽ ഉച്ചഭക്ഷണ ഇടവേള വെട്ടിച്ചുരുക്കി സമയക്രമത്തിൽ മാറ്റം വരുത്തുമെന്നും മന്ത്രി വ്യക്തമാക്കി.

മഴയുടെ വെല്ലുവിളികൾക്കിടയിലും മികച്ച പ്രകടനങ്ങൾക്കും പുതിയ കായികപ്രതിഭകളുടെ ഉദയത്തിനുമായി കാത്തിരിക്കുകയാണ് കായികകേരളം.