പാലക്കാട്: ജീവനക്കാര് നോക്കിനില്ക്കെ പുലര്ച്ചെ പാലക്കാട് ഡിപ്പോയ്ക്ക് സമീപത്തുനിന്ന് കെഎസ്ആര്ടിസി ബസ് ഓടിച്ചുകൊണ്ടുപോയ യുവാവ് 18 ദിവസത്തിനുശേഷം പിടിയില്. മേപ്പറമ്പ് നെല്ലിക്കാട് കാദര് മന്സിലില് ഫാസിലാണ് (25) പിടിയിലായത്. തമിഴ്നാട്, ഹിമാചല്പ്രദേശ് ഉള്പ്പെടെയുള്ള സംസ്ഥാനങ്ങളില് കറങ്ങി നടന്ന ശേഷം നാട്ടില് തിരിച്ചെത്തിയപ്പോള് മണപ്പുള്ളിക്കാവിന് സമീപത്തു നിന്നാണ് ഇയാളെ പാലക്കാട് ടൗണ് സൗത്ത് പൊലീസ് പിടികൂടിയത്. മദ്യലഹരിയില് ബസ് ഓടിക്കാനുള്ള ആഗ്രഹം കൊണ്ട് ബസ് എടുത്തെന്നാണ് ഫാസില് പൊലീസിനോട് പറഞ്ഞത്.
ബസില് കയറി ബട്ടണ് അമര്ത്തിയപ്പോള്ത്തന്നെ സ്റ്റാര്ട്ടായെന്നും ഓടിക്കാന് ആഗ്രഹം തോന്നിയപ്പോള് മുന്നോട്ടെടുത്തെന്നും തെളിവെടുപ്പിനിടെ പ്രതി പറഞ്ഞു. മോഷ്ടിക്കാന് ഉദ്ദേശിച്ചിരുന്നില്ല. ബസ് ഓടിച്ചിട്ടില്ലെങ്കിലും നേരത്തേ വലിയ വാഹനങ്ങള് ഓടിച്ച് പരിചയമുണ്ടെന്നും ഫാസില് പറഞ്ഞു. അധികൃതര് ഉത്തരവാദിത്വമില്ലാതെ ബസ് വഴിയോരത്ത് നിര്ത്തിയിടാമോയെന്നും പ്രതി പൊലീസിനോട് ചോദിച്ചു. ജൂണ് ഏഴിന് പുലര്ച്ചെ 2.50-നാണ് ബസ് മോഷണം പോയത്.
