ന്യൂഡൽഹി: അയോധ്യയിലെ രാമക്ഷേത്ര സംഭാവന തട്ടിപ്പിൽ സിബിഐ അന്വേഷണം ആവശ്യപ്പെട്ടുള്ള ഹർജികളിൽ സുപ്രീംകോടതി രാമക്ഷേത്ര ട്രസ്റ്റിന് നോട്ടീസ് അയച്ചു. ഹർജികളിൽ ഒരാഴ്ചയ്ക്കകം മറുപടി നൽകാനാണ് ട്രസ്റ്റിനോട് കോടതി നിർദേശിച്ചത്.

ഉത്തർപ്രദേശ് സർക്കാർ രൂപീകരിച്ച പ്രത്യേക അന്വേഷണ സംഘത്തിന്റെ അന്വേഷണ പുരോഗതി സംബന്ധിച്ച റിപ്പോർട്ടും സമർപ്പിക്കണമെന്ന് സുപ്രീംകോടതി സംസ്ഥാന സർക്കാരിനോട് ആവശ്യപ്പെട്ടു. ചീഫ് ജസ്റ്റിസ് അധ്യക്ഷനായ ബെഞ്ചാണ് ഹർജികൾ പരിഗണിച്ചത്. കേസ് അടുത്ത തിങ്കളാഴ്ച വീണ്ടും പരിഗണിക്കും.

ഉത്തർപ്രദേശ് സർക്കാർ പ്രഖ്യാപിച്ച എസ്‌ഐടി അന്വേഷണം പര്യാപ്തമല്ലെന്നും, കേസിൽ സിബിഐ അന്വേഷണം വേണമെന്നുമാണ് ഹർജിക്കാരുടെ ആവശ്യം. ക്ഷേത്രത്തിന്റെ സാമ്പത്തിക ഇടപാടുകളിൽ സമഗ്ര ഫോറൻസിക് ഓഡിറ്റ് നടത്തണമെന്നും ആർജെഡി എംപി സുധാകർ സിംഗ് സമർപ്പിച്ച ഹർജിയിൽ ആവശ്യപ്പെടുന്നു.

നേരത്തെ വിഷയത്തിൽ ലഖ്‌നൗ കോടതിയിലും ഹർജികൾ എത്തിയിരുന്നെങ്കിലും, സുപ്രീംകോടതി കേസ് പരിഗണിക്കുന്ന സാഹചര്യത്തിൽ അവ തള്ളിയിരുന്നു.

അതേസമയം, കേസിൽ എസ്‌ഐടി അന്വേഷണം തുടരുകയാണ്. ട്രസ്റ്റ് അംഗങ്ങളെ ചോദ്യം ചെയ്യുന്നതിനുള്ള നടപടികളും പുരോഗമിക്കുകയാണ്. പ്രധാന പ്രതികളെ ഇതിനകം ചോദ്യം ചെയ്ത അന്വേഷണസംഘം ഈ മാസം 15നകം റിപ്പോർട്ട് സമർപ്പിക്കാനാണ് ലക്ഷ്യമിടുന്നത്. ടിന്റു യാദവ് ഉൾപ്പെടെയുള്ള പ്രതികളെ കസ്റ്റഡിയിൽ വാങ്ങുന്നതിനായി കോടതിയെ സമീപിക്കാനും എസ്‌ഐടി ഒരുങ്ങുകയാണ്.

ഇതിനിടെ, ബദ്രിനാഥ് ക്ഷേത്രത്തിലെ സംഭാവന മോഷണവുമായി ബന്ധപ്പെട്ട കേസിൽ ക്ഷേത്രസമിതി ചെയർമാന്റെ പേഴ്‌സണൽ അസിസ്റ്റന്റായ പ്രമോദ് നൗട്ടിയാലിനെ ഉത്തരാഖണ്ഡ് പൊലീസ് അറസ്റ്റ് ചെയ്തു. ക്രമക്കേടുകൾ കണ്ടെത്തിയതിനെ തുടർന്ന് ഇയാളെ നേരത്തെ സസ്പെൻഡ് ചെയ്തിരുന്നു. ക്ഷേത്രത്തിൽ നിന്ന് സംഭാവന മോഷ്ടിക്കുന്നതിന്റെ സിസിടിവി ദൃശ്യങ്ങളും അന്വേഷണസംഘത്തിന് ലഭിച്ചിട്ടുണ്ട്. ഡെറാഡൂണിലെ വസതിയിൽ നിന്നാണ് പ്രതിയെ അറസ്റ്റ് ചെയ്തത്.