ന്യൂഡൽഹി: ഡൽഹി മുൻ മുഖ്യമന്ത്രിയും ആം ആദ്മി പാർട്ടി നേതാവുമായ അരവിന്ദ് കെജ്രിവാളിനെതിരെ രൂക്ഷ വിമർശനവുമായി സ്വാതി മാലിവാൾ രംഗത്തെത്തി. എഎപി വിട്ട് ബിജെപിയിൽ ചേർന്നതിന് പിന്നാലെയാണ് അവർ കെജ്രിവാളിനെതിരെ ഗുരുതര ആരോപണങ്ങൾ ഉന്നയിച്ചത്.
2024-ൽ മുഖ്യമന്ത്രിയുടെ വസതിയിൽ വെച്ച് കെജ്രിവാളിന്റെ പേഴ്സണൽ അസിസ്റ്റന്റ് ബിഭവ് കുമാർ തന്നെ മർദ്ദിച്ച സംഭവത്തെ തുടർന്നാണ് താൻ ശക്തമായ നിലപാട് എടുത്തതെന്ന് സ്വാതി മാലിവാൾ പറഞ്ഞു. ഈ കേസിൽ നൽകിയ എഫ്ഐആർ പിൻവലിക്കാൻ തന്നെതിരെ സമ്മർദ്ദം ഉണ്ടായെന്നും, കഴിഞ്ഞ രണ്ട് വർഷമായി പാർലമെന്റിൽ സംസാരിക്കാൻ അവസരം പോലും ലഭിക്കാത്ത അവസ്ഥയുണ്ടായിരുന്നെന്നും അവർ ആരോപിച്ചു.
കെജ്രിവാൾ അഴിമതി വിരുദ്ധ പോരാട്ടങ്ങളിലൂടെ ഉയർന്നുവന്ന നേതാവായിരുന്നുവെങ്കിലും പിന്നീട് ആ ആശയങ്ങളിൽ നിന്ന് മാറിയെന്നാണ് അവരുടെ വിമർശനം. 2011-ലെ സമരകാലത്തെ ലളിതജീവിതത്തെ ഓർമ്മിപ്പിച്ചുകൊണ്ട്, ഇന്ന് അദ്ദേഹം ആഡംബര ജീവിതം നയിക്കുന്നുവെന്നും “ശീഷ് മഹൽ” പോലുള്ള വൻ ചെലവിൽ നിർമിച്ച വസതി അതിന്റെ ഉദാഹരണമാണെന്നും അവർ ആരോപിച്ചു. പഞ്ചാബ് ഭരണം എഎപിയുടെ ‘പേഴ്സണൽ എടിഎം’ ആയി മാറിയെന്ന വിമർശനവും അവർ ഉയർത്തി.
പ്രധാനമന്ത്രി നരേന്ദ്ര മോദിയോടുള്ള വിശ്വാസമാണ് ബിജെപിയിൽ ചേർക്കാൻ കാരണമെന്ന് സ്വാതി വ്യക്തമാക്കി. മോദിയുടെ നേതൃത്വത്തിൽ വനിതാ സംവരണ ബിൽ ഉൾപ്പെടെ നിരവധി ചരിത്രപരമായ തീരുമാനങ്ങൾ ഉണ്ടായെന്നും അവർ പറഞ്ഞു.
അതേസമയം, ഏഴ് രാജ്യസഭാ എംപിമാർ പാർട്ടി വിട്ടത് ബിജെപിയുടെ “ഓപ്പറേഷൻ ലോട്ടസ്” ഭാഗമാണെന്ന് എഎപി നേതാവ് സഞ്ജയ് സിങ് ആരോപിച്ചു. പാർട്ടി വിട്ടവർ വഞ്ചകരാണെന്നും എഎപി നിലപാട് അറിയിച്ചു.
ഇതിന് മറുപടിയായി സ്വാതി മാലിവാൾ കെജ്രിവാളിനെതിരെ വീണ്ടും കടുത്ത വിമർശനം ഉന്നയിച്ചു. സമരകാലത്തെ ലളിതത്വത്തിന്റെ പേരിൽ ജനങ്ങളെ സ്വാധീനിച്ച നേതാവ് അധികാരത്തിൽ എത്തിയ ശേഷം ആഡംബര ജീവിതത്തിലേക്ക് മാറിയെന്നും, മുഖ്യമന്ത്രി പദത്തിൽ നിന്ന് പോയപ്പോൾ വൻ സുരക്ഷാ അകമ്പടിയോടെയാണ് അദ്ദേഹം യാത്ര ചെയ്തിരുന്നതെന്നും അവർ പറഞ്ഞു.
കെജ്രിവാളിന്റെ പ്രവർത്തനങ്ങൾ അദ്ദേഹത്തിന്റെ പഴയ നിലപാടുകൾക്ക് വിരുദ്ധമാണെന്നും, അതിനാൽ തന്നെ അദ്ദേഹത്തിന്റെ രാഷ്ട്രീയ മാറ്റങ്ങളെ വിമർശിക്കേണ്ടതുണ്ടെന്നും സ്വാതി മാലിവാൾ കൂട്ടിച്ചേർത്തു.
