കൊച്ചി: താരസംഘടനയായ ‘അമ്മ’യിൽ വീണ്ടും പ്രതിസന്ധി. ഭരണസമിതി അംഗങ്ങൾ രാജി പ്രഖ്യാപിച്ചെങ്കിലും അത് ഔദ്യോഗികമായി സമർപ്പിച്ചിട്ടില്ലെന്നാണ് പുറത്തുവരുന്ന വിവരം. ഇതോടെ സംഘടനയുടെ പ്രവർത്തനങ്ങൾ നിയന്ത്രിക്കാൻ രൂപീകരിച്ച അഡ്ഹോക്ക് കമ്മിറ്റിയുടെ നിയമസാധുതയെക്കുറിച്ചും ചർച്ചകൾ ശക്തമായി.
ജൂൺ 21-ന് നടന്ന ജനറൽ ബോഡി യോഗത്തിനിടെ ഉണ്ടായ തർക്കങ്ങൾക്ക് പിന്നാലെയാണ് ജനറൽ സെക്രട്ടറി ശ്വേതാ മേനോൻ പദവി ഒഴിയുന്നതായി പ്രഖ്യാപിച്ചത്. ഭരണസമിതിയിലെ 17 പേരും രാജിവെക്കുമെന്ന് അറിയിച്ചിരുന്നു. എന്നാൽ സംഘടനയുടെ ചട്ടപ്രകാരം രാജി സംബന്ധിച്ച ഔദ്യോഗിക നടപടികൾ ഇതുവരെ പൂർത്തിയായിട്ടില്ലെന്നാണ് റിപ്പോർട്ടുകൾ.
നിലവിലെ ഭരണസമിതി ഔദ്യോഗികമായി രാജിവെച്ചിട്ടില്ലെങ്കിൽ അഡ്ഹോക്ക് കമ്മിറ്റി രൂപീകരിച്ചത് ചട്ടങ്ങൾക്ക് വിരുദ്ധമാണെന്ന് ഒരു വിഭാഗം അംഗങ്ങൾ ആരോപിക്കുന്നു. ഇതിനിടെ രമേശ് പിഷാരടിയുടെ നേതൃത്വത്തിലുള്ള അഡ്ഹോക്ക് കമ്മിറ്റി ‘അമ്മ’ ഓഫീസിൽ യോഗം ചേർന്നു. മുൻ ഭാരവാഹികളിൽ ചിലരും യോഗത്തിൽ പങ്കെടുത്തു.
സംഘടനയിൽ സാമ്പത്തിക ക്രമക്കേടുകൾ ഉൾപ്പെടെയുള്ള ആരോപണങ്ങൾ ഉയർന്നതോടെയാണ് അഭിപ്രായ ഭിന്നത രൂക്ഷമായത്. രാജി പ്രഖ്യാപിച്ച ശേഷം ശ്വേതാ മേനോൻ ചിലർ തനിക്കെതിരെ ദുഷ്പ്രചാരണങ്ങൾ നടത്തിയെന്നും മുൻ ഭരണസമിതിയുടെ പ്രവർത്തനങ്ങൾ പരിശോധിക്കാനുള്ള അവസരം നിഷേധിക്കപ്പെട്ടെന്നും ആരോപിച്ചിരുന്നു.
