ന്യൂഡൽഹി: ചായ കുടിക്കുന്നവർക്കെതിരെ വിവാദ പ്രസ്താവനയുമായി സാധ്വി ശ്രദ്ധ ഗോപാൽ രംഗത്ത്. ഹിന്ദുക്കൾ തങ്ങളുടെ സംസ്കാരം സംരക്ഷിക്കാൻ ചായ ഒഴിവാക്കണമെന്നും, ചായ കുടിക്കുന്നവർ പശുവിനെ കൊല്ലുന്നവരാണെന്നും അവർ പ്രസംഗത്തിൽ പറഞ്ഞു.
വ്യാസപീഠത്തിൽ നടത്തിയ ഈ പ്രസംഗത്തിന്റെ വീഡിയോ സോഷ്യൽ മീഡിയയിൽ വൈറലായിരിക്കുകയാണ്. രാജസ്ഥാൻ സ്വദേശിനിയായ സാധ്വി ശ്രദ്ധ ഗോപാൽ, സംസ്കാര-ധർമ്മ സംരക്ഷണവുമായി ബന്ധപ്പെട്ട പ്രസംഗങ്ങൾക്കാണ് അറിയപ്പെടുന്നത്. “ചായ ഇല്ലാതിരുന്ന കാലത്ത് നമ്മുടെ മുൻഗാമികൾ ജീവിച്ചിരുന്നില്ലേയെന്നും, ചായ കുടിക്കാത്തതുകൊണ്ട് അവർ മരിച്ചുപോയിട്ടില്ലല്ലോ” എന്നും അവർ പറഞ്ഞു. ചായ കുടിക്കുന്നവർ അത് ഒഴിവാക്കണമെന്നും, ചായ ഇല്ലാതെ ജീവിക്കുന്ന സമൂഹങ്ങളും ഉണ്ടെന്നും അവർ കൂട്ടിച്ചേർത്തു. ഈ പ്രസ്താവനയ്ക്ക് പിന്നാലെ സോഷ്യൽ മീഡിയയിൽ വ്യാപകമായ വിമർശനമാണ് ഉയരുന്നത്.
