തിരുവനന്തപുരം: തിരുവനന്തപുരത്തെ മൃഗശാല ഇളമ്പ്രകോട് വനമേഖലയ്ക്ക് സമീപത്തേക്ക് മാറ്റി സ്ഥാപിക്കണമെന്ന ആവശ്യവുമായി മടവൂർ ഗ്രാമപഞ്ചായത്ത് സർക്കാരിനെ സമീപിച്ചു. ഇളമ്പ്രകോട് സംരക്ഷിത വനമേഖല ബനാർഹട്ട മാതൃകയിൽ വികസിപ്പിക്കുന്നത് നേരത്തെ പരിഗണനയിലുണ്ടായിരുന്നുവെന്നും പഞ്ചായത്ത് ചൂണ്ടിക്കാട്ടുന്നു.
ജഡായുപാറയിലേക്കുള്ള പ്രധാന പാതയോട് ചേർന്ന പ്രദേശമാണിത്. ദേശീയപാതയുമായും സംസ്ഥാനപാതയുമായും അടുത്തും, താരതമ്യേന തിരക്ക് കുറഞ്ഞ മേഖലയുമാണെന്നാണ് പഞ്ചായത്തിന്റെ വാദം.
അതേസമയം, തിരുവനന്തപുരത്തെ മൃഗശാല മാറ്റി സ്ഥാപിക്കുന്നതിനെ അനുകൂലിച്ചും എതിർത്തുമുള്ള വാദങ്ങൾ ശക്തമാകുകയാണ്. മൃഗശാലയുടെ പുതിയ സ്ഥലം സംബന്ധിച്ച ചർച്ചകൾക്കിടെയാണ് മടവൂർ പഞ്ചായത്തിന്റെ നിർദേശം.
