തൃശ്ശൂർ: കുന്നംകുളം കാണിയാമ്പലിൽ ഇന്ന് പുലർച്ചെ രണ്ടുമണിയോടെ ഉണ്ടായ ബൈക്ക് അപകടത്തിൽ രണ്ട് യുവാക്കൾ മരിച്ചു. കാവിലക്കാട് സ്വദേശികളായ പ്രണവ് (26), ജിഷ്ണു (27) എന്നിവരാണ് അപകടത്തിൽ മരണപ്പെട്ടത്. കാണിപ്പയ്യൂരിൽ നിന്ന് ചായകുടിച്ച് മടങ്ങുകയായിരുന്ന ഇവർ സഞ്ചരിച്ച ബൈക്ക്, കാണിയാമ്പാൽ പനങ്ങായി ഇറക്കത്തിൽ നിയന്ത്രണം വിട്ട് വൈദ്യുത പോസ്റ്റിൽ ഇടിച്ചുമറിയുകയായിരുന്നു.

ഒപ്പമുണ്ടായിരുന്ന മറ്റൊരു ബൈക്കിലുള്ളവർ പിന്നിലുണ്ടായിരുന്ന ഇവരെ കാണാതായതോടെ തിരികെ എത്തിയപ്പോഴാണ് അപകടം ശ്രദ്ധയിൽപ്പെട്ടത്. ഉടൻ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. മൃതദേഹങ്ങൾ മലങ്കര ആശുപത്രി മോർച്ചറിയിൽ സൂക്ഷിച്ചിരിക്കുകയാണ്. പ്രദേശത്ത് പുലർച്ചെ സമയങ്ങളിൽ റോഡ് സുരക്ഷ ശക്തമാക്കണമെന്ന ആവശ്യം നാട്ടുകാർ ഉന്നയിക്കുന്നു.