ആരോഗ്യ സംബന്ധമായ എന്ത് സംശയങ്ങൾക്കും ഇന്ന് നമ്മൾ ആദ്യം ആശ്രയിക്കുന്നത് സ്മാർട്ട്ഫോണുകളെയും സോഷ്യൽ മീഡിയ പ്ലാറ്റ്‌ഫോമുകളെയുമാണ്. ഇൻസ്റ്റഗ്രാമിലും യൂട്യൂബ് റീൽസുകളിലും ഡോക്ടർമാരും ഹെൽത്ത് ഇൻഫ്ലുവൻസർമാരും നൽകുന്ന ലളിതമായ നിർദ്ദേശങ്ങൾ പാലിച്ച് സ്വയം ചികിത്സ നടത്തുന്നവരുടെ എണ്ണം നാൾക്കുനാൾ വർധിച്ചുവരികയാണ്. എന്നാൽ ശാസ്ത്രീയമായ പരിശോധനകളോ വ്യക്തിഗതമായ വൈദ്യോപദേശമോ ഇല്ലാതെ ഇത്തരം വിരൽത്തുമ്പ് അറിവുകളെ അന്ധമായി വിശ്വസിക്കുന്നത് എത്രത്തോളം അപകടകരമാണെന്ന് വ്യക്തമാക്കുന്ന ഒരു വാർത്തയാണ് ഇപ്പോൾ അമേരിക്കയിൽ നിന്നും പുറത്തുവരുന്നത്. പ്രകൃതിദത്തമായ ഔഷധങ്ങൾ പോലും അമിതമായാൽ ശരീരത്തിന് വില്ലനാകുമെന്ന് 57 വയസുകാരിയായ കേറ്റി മോഹന്റെ അനുഭവം നമ്മെ ഓർമ്മിപ്പിക്കുന്നു.

ശരീരത്തിലെ വീക്കം കുറയ്ക്കാനും സന്ധിവേദനയ്ക്ക് പരിഹാരമെന്ന നിലയിലും ഇൻസ്റ്റഗ്രാമിൽ ഒരു ഡോക്ടർ പങ്കുവെച്ച വീഡിയോ കണ്ടാണ് കേറ്റി മഞ്ഞൾ സപ്ലിമെന്റുകൾ കഴിക്കാൻ തീരുമാനിച്ചത്. നമ്മുടെ അടുക്കളയിലെ ഒഴിച്ചുകൂടാനാവാത്ത സാന്നിധ്യമായ മഞ്ഞൾ സുരക്ഷിതമാണെന്ന വിശ്വാസത്തിലായിരുന്നു അവർ. എന്നാൽ ഏതാനും ആഴ്ചകൾ പിന്നിട്ടപ്പോൾ തന്നെ കഠിനമായ വയറുവേദന, വിട്ടുമാറാത്ത ഓക്കാനം, അമിതമായ ക്ഷീണം എന്നിവ അവരെ അലട്ടാൻ തുടങ്ങി. വേണ്ടത്ര വെള്ളം കുടിച്ചിട്ടും മൂത്രം കടുത്ത നിറത്തിൽ കാണപ്പെട്ടതോടെയാണ് അവർ വിദഗ്ധ ചികിത്സ തേടിയത്. പരിശോധനയിൽ മഞ്ഞളിലെ സജീവ ഘടകമായ ‘കുർക്കുമിൻ’ അമിതമായി ശരീരത്തിലെത്തിയത് കരളിലെ എൻസൈമുകളുടെ അളവ് അപകടകരമായ രീതിയിൽ വർധിപ്പിച്ചതായി കണ്ടെത്തി. ഇത് കരളിന്റെ പ്രവർത്തനത്തെ സാരമായി ബാധിക്കുകയും ശരീരത്തിന് വിഷതുല്യമായി മാറുകയും ചെയ്തു.

ആന്റി-ഇൻഫ്ലമേറ്ററി, ആന്റിഓക്‌സിഡന്റ് ഗുണങ്ങളാൽ സമ്പന്നമായ മഞ്ഞൾ ആരോഗ്യത്തിന് ഏറെ ഉത്തമമാണെന്ന കാര്യത്തിൽ തർക്കമില്ല. ഭക്ഷണത്തിൽ ചെറിയ അളവിൽ ചേർക്കുന്ന മഞ്ഞൾ പൊതുവെ സുരക്ഷിതവുമാണ്. എന്നാൽ ഗുളികകളുടെയോ ക്യാപ്‌സ്യൂളുകളുടെയോ രൂപത്തിലുള്ള സപ്ലിമെന്റുകൾ ഉയർന്ന ഡോസിൽ ദീർഘകാലം കഴിക്കുമ്പോൾ അത് ദഹനപ്രക്രിയയെയും ആന്തരിക അവയവങ്ങളെയും ദോഷകരമായി ബാധിക്കും. മഞ്ഞൾ സപ്ലിമെന്റുകൾ അമിതമായി ഉപയോഗിക്കുന്നത് വയറുവേദന, ദഹനക്കേട്, വയറിളക്കം തുടങ്ങിയ പ്രശ്നങ്ങളിലേക്കും അപൂർവ്വമായി കരൾ വീക്കത്തിലേക്കും നയിച്ചേക്കാം. ഓരോ വ്യക്തിയുടെയും ശാരീരികാവസ്ഥ വ്യത്യസ്തമായതിനാൽ ഒരാൾക്ക് ഫലപ്രദമായത് മറ്റൊരാൾക്ക് ഗുണകരമാകണമെന്നില്ല.

പ്രത്യേകിച്ച് മറ്റ് രോഗങ്ങൾക്ക് മരുന്ന് കഴിക്കുന്നവർ ഇത്തരം സപ്ലിമെന്റുകളുടെ കാര്യത്തിൽ വലിയ ജാഗ്രത പുലർത്തേണ്ടതുണ്ട്. പ്രമേഹത്തിനോ രക്തം കട്ടപിടിക്കാതിരിക്കാനോ മരുന്ന് കഴിക്കുന്നവർ, പിത്താശയ സംബന്ധമായ പ്രശ്നങ്ങൾ ഉള്ളവർ എന്നിവർ മഞ്ഞൾ സപ്ലിമെന്റുകൾ ഉപയോഗിക്കുന്നതിന് മുൻപ് നിർബന്ധമായും ഡോക്ടറുടെ അനുവാദം വാങ്ങിയിരിക്കണം. വയറു വീർക്കൽ, അകാരണമായ ക്ഷീണം തുടങ്ങിയ ചെറിയ ലക്ഷണങ്ങൾ പോലും അവഗണിക്കാതെ വൈദ്യസഹായം തേടുന്നത് അപകടങ്ങൾ ഒഴിവാക്കാൻ സഹായിക്കും. പ്രകൃതിദത്തമായ ഔഷധമാണെങ്കിൽ പോലും അവ കൃത്യമായ അളവിലും ഇടവേളകളിലും മാത്രമേ ഉപയോഗിക്കാവൂ. സോഷ്യൽ മീഡിയയിലെ താൽക്കാലിക ട്രെൻഡുകളെക്കാൾ ഉപരി സ്വന്തം ആരോഗ്യത്തിന് മുൻഗണന നൽകി ശാസ്ത്രീയമായ ചികിത്സാ രീതികൾ പിന്തുടരേണ്ടതിന്റെ ആവശ്യകതയാണ് ഈ സംഭവം അടിവരയിടുന്നത്.