ബീജിങ്: ചൈനയിൽ അഴിമതിക്കേസിൽ മുൻ പ്രതിരോധ മന്ത്രിമാരായ വേ ഫെംഗെയും ലി ഷാങ്ഫുയും വധശിക്ഷയ്ക്ക് വിധിക്കപ്പെട്ടതായി റിപ്പോർട്ട്. ഈ തീരുമാനം പ്രസിഡന്റ് ഷി ജിൻപിങ്ൻറെ നേതൃത്വത്തിലുള്ള സർക്കാർ പ്രഖ്യാപിച്ചതാണെന്ന് ചൈനീസ് ഔദ്യോഗിക വാർത്താ ഏജൻസിയായ ഷിൻഹുവ അറിയിച്ചു. സൈനിക-രാഷ്ട്രീയ മേഖലയിലെ അഴിമതി വിരുദ്ധ നടപടികളുടെ ഭാഗമായാണ് ഈ നടപടി എന്നാണ് വിലയിരുത്തൽ.
ലി ഷാങ്ഫുവിനെതിരെ 2024-ലാണ് അന്വേഷണം ആരംഭിച്ചത്. ഔദ്യോഗിക പദവി ദുരുപയോഗം ചെയ്ത് വലിയ തുക കൈക്കൂലിയായി സ്വീകരിച്ചതും സൈനിക നിയമനങ്ങളിൽ ഇടപെട്ടതുമാണ് ആരോപണം. പിന്നീട് അദ്ദേഹത്തെ കമ്മ്യൂണിസ്റ്റ് പാർട്ടിയിൽ നിന്ന് പുറത്താക്കി. അദ്ദേഹത്തിന്റെ മുൻഗാമിയായ വേ ഫെംഗെയ്ക്കും സമാനമായ അഴിമതി ആരോപണങ്ങളാണ് ഉണ്ടായത്. ഇരുവരുടെയും കേസുകൾ ചൈനീസ് പീപ്പിൾസ് ലിബറേഷൻ ആർമിയിലെ ഉന്നത തല അഴിമതി അന്വേഷണത്തിന്റെ ഭാഗമായാണ് മുന്നോട്ടുപോയത്.
കഴിഞ്ഞ വർഷം തന്നെ സൈന്യത്തിലെ നിരവധി ഉന്നത ഉദ്യോഗസ്ഥരെ അഴിമതി ആരോപണത്തിൽ നിന്ന് പുറത്താക്കിയിരുന്നു. ഇതിൽ സെൻട്രൽ മിലിട്ടറി കമ്മീഷൻ അംഗങ്ങളും ഉൾപ്പെടുന്നു. അഴിമതി ഇല്ലാതാക്കുന്നതിനൊപ്പം സൈന്യത്തിലെ നിയന്ത്രണം കൂടുതൽ ശക്തമാക്കാനുള്ള ശ്രമമായാണ് ഈ നീക്കങ്ങളെ രാഷ്ട്രീയ നിരീക്ഷകർ വിലയിരുത്തുന്നത്.
