തിരൂര്: താനൂര് മണ്ഡലത്തെ പാക്കിസ്ഥാനെന്നു വിശേഷിപ്പിച്ച് മന്ത്രി വി. അബ്ദുറഹിമാന് നടത്തിയ പരാമര്ശം വിവാദത്തില്. തിരൂര് മണ്ഡലത്തിലെ എല്ഡിഎഫ് സ്ഥാനാര്ഥിയായ അബ്ദുറഹിമാന് മണ്ഡലത്തിലെ കുട്ടികളത്താണിയില് തിരഞ്ഞെടുപ്പു പ്രചാരണത്തിന്റെ ഭാഗമായി നടത്തിയ സംഗീത പരിപാടിക്കിടെയാണ് വിവാദ പരാമര്ശമുണ്ടായത്. 2 തവണ താനൂരില് നിന്നു ജയിച്ച മന്ത്രി തിരൂരിലേക്കു മാറിയത് ഒളിച്ചോട്ടമാണെന്ന യുഡിഎഫ് വിമര്ശനത്തിനു മറുപടി പറയുന്നതിനിടെയായിരുന്നു പരാമര്ശം.
‘താനൂരില് നിന്ന് ഒളിച്ചോടിയെന്നാണ് എതിരാളികള് പറയുന്നത്. എന്നാല്, 2 മാച്ചുകള് പാക്കിസ്ഥാനില് കളിച്ച് രണ്ടിലും അവരെ തോല്പിച്ചു. മൂന്നാമത്തെ മാച്ച് ഇനി ഹോം ഗ്രൗണ്ടിലാണ്’ എന്നായിരുന്നു മന്ത്രിയുടെ വാക്കുകള്. പ്രസംഗത്തിന്റെ വിഡിയോ പ്രചരിച്ചതോടെ കടുത്ത വിമര്ശനവുമായി യുഡിഎഫ് രംഗത്തെത്തി. ഇത് താനൂരിനെ അപമാനിക്കുന്നതാണെന്നാണ് യുഡിഎഫ് പറയുന്നത്.
