കോഴിക്കോട്: വടകര കാഫിർ സ്ക്രീൻഷോട്ട് കേസിൽ മൂന്ന് പേരെക്കൂടി പ്രതിചേർത്ത് പൊലീസ്. സ്ക്രീൻഷോട്ട് ഫേസ്ബുക്കിലൂടെ പങ്കുവെച്ച തൃശ്ശൂർ സ്വദേശി വഹാബ്, സിപിഎം പ്രവർത്തകരായ നാദാപുരം സ്വദേശി അതുൽ, തിരുവള്ളൂർ സ്വദേശി അതുൽപ്രസാദ് എന്നിവരെയാണ് കേസിൽ പ്രതിചേർത്തത്. ഇവരെ ചോദ്യം ചെയ്തശേഷം വിട്ടയച്ചതായാണ് വിവരം. ഇതുസംബന്ധിച്ച റിപ്പോർട്ട് പൊലീസ് കോടതിയിൽ സമർപ്പിച്ചു.
കേസുമായി ബന്ധപ്പെട്ട് കൂടുതൽ പേരെ പ്രതിചേർക്കുന്നതിനാവശ്യമായ വിവരങ്ങൾ കൈമാറണമെന്ന് ആവശ്യപ്പെട്ടിട്ടും മെറ്റയിൽനിന്ന് പ്രതികരണം ലഭിച്ചിട്ടില്ലെന്നാണ് പൊലീസിന്റെ നിലപാട്. ഇതേത്തുടർന്ന് മെറ്റയ്ക്ക് നോട്ടീസ് അയക്കണമെന്നാവശ്യപ്പെട്ട് കോടതിയിൽ അപേക്ഷ നൽകാനും അന്വേഷണസംഘം തീരുമാനിച്ചിട്ടുണ്ട്.
കേസിൽ നേരത്തെ അറസ്റ്റിലായ ഡിവൈഎഫ്ഐ നേതാക്കളായ റിബേഷ് രാമകൃഷ്ണൻ, ജിതിൻ ഭാസ്കർ, അമൽ എന്നിവർ നിലവിൽ ജാമ്യത്തിലാണ്. വിവാദ സ്ക്രീൻഷോട്ട് പ്രചരിച്ചതുമായി ബന്ധപ്പെട്ട് അന്വേഷണം തുടരുകയാണ്.
സ്ക്രീൻഷോട്ടിന്റെ ഉറവിടം, പ്രചാരണത്തിൽ പങ്കാളികളായവരുടെ വിവരങ്ങൾ, സമൂഹമാധ്യമങ്ങളിലൂടെ ഉള്ളടക്കം പങ്കുവെച്ചവരുടെ പങ്ക് തുടങ്ങിയ കാര്യങ്ങളിലാണ് പൊലീസ് കൂടുതൽ അന്വേഷണം നടത്തുന്നത്.
കേസിൽ കൂടുതൽ പേരെ പ്രതിചേർക്കുന്നതിനുള്ള ഡിജിറ്റൽ തെളിവുകൾ ശേഖരിക്കാനും അന്വേഷണസംഘം ശ്രമിക്കുന്നുണ്ട്. മെറ്റയിൽനിന്നുള്ള വിവരങ്ങൾ ലഭിക്കുന്നതും കോടതിയുടെ തുടർനടപടികളും അന്വേഷണത്തിൽ നിർണായകമാകും.
