തിരുവനന്തപുരം: നിയമസഭാ നടപടികൾക്ക് മുന്നോടിയായി നടന്ന നയപ്രഖ്യാപന ചടങ്ങിൽ ഗവർണർ രാജേന്ദ്ര ആർലേക്കർ അതൃപ്തി പ്രകടിപ്പിച്ചു. ചടങ്ങിനിടെ “വന്ദേമാതരം” പൂർണമായി ആലപിക്കാത്തതാണ് ഗവർണറുടെ വിമർശനത്തിന് കാരണമായത്.
വന്ദേമാതരം മുഴുവൻ പാടേണ്ടതായിരുന്നുവെന്ന് ലോക്ഭവനിൽ നിന്ന് നിർദേശം ഉണ്ടായിരുന്നുവെന്നും, എന്നാൽ അതനുസരിച്ച് ആലാപനം നടന്നില്ലെന്നും ഗവർണർ പറഞ്ഞു. സംഭവത്തിൽ വിശദീകരണം തേടണോ എന്ന കാര്യത്തിൽ ഇപ്പോൾ തീരുമാനിച്ചിട്ടില്ലെന്നും അദ്ദേഹം വ്യക്തമാക്കി.
നയപ്രഖ്യാപന ചടങ്ങിൽ പൂർണ ആലാപനം നടക്കേണ്ടതായിരുന്നുവെന്നും ഇത് പ്രോട്ടോകോൾ ലംഘനമായി കാണുന്നുവെന്നും ഗവർണർ പ്രതികരിച്ചു. വിഷയത്തിൽ സർക്കാർ സ്വീകരിക്കുന്ന തുടർനടപടി ശ്രദ്ധയോടെ കാണുമെന്നും അദ്ദേഹം പറഞ്ഞു.
ചടങ്ങിനിടെ നയപ്രഖ്യാപനത്തിന് മുമ്പും ശേഷവും വന്ദേമാതരം ഭാഗികമായി മാത്രം ആലപിച്ചതായാണ് റിപ്പോർട്ട്. വിഷയത്തിൽ സർക്കാർ നിർദേശങ്ങൾക്കനുസരിച്ചാണ് ആലാപനം നടന്നതെന്ന സൂചനയും പുറത്തുവരുന്നു.
