ദുല്ഖര് സല്മാന്റെ വേഫെറര് ഫിലിംസ് നിര്മ്മിച്ച ഏഴാം ചിത്രമായ ‘ ലോക – ചാപ്റ്റര് വണ്:ചന്ദ്ര’യുടെ ദുബായ് ലോഞ്ച് നടന്നു. കഴിഞ്ഞ ദിവസം ദുബായിലെ 369 സിനിമാസില് ആണ് ചിത്രത്തിന്റെ ദുബായ് ലോഞ്ച് നടന്നത്. ദുല്ഖര് സല്മാന്, ടോവിനോ തോമസ്, കല്യാണി പ്രിയദര്ശന്, നസ്ലന്, ചന്ദു സലിം കുമാര്, സംവിധായകന് ഡൊമിനിക് അരുണ്, അരുണ് കുര്യന് എന്നിവര് ചടങ്ങില് പങ്കെടുത്തു. പ്രേക്ഷകരോടൊപ്പം ചിത്രം കണ്ട അണിയറ പ്രവര്ത്തകര് അവര്ക്കൊപ്പം സംവദിക്കുകയും സമയം ചിലവഴിക്കുകയും ചെയ്തു. കേരളത്തിന് അകത്തും പുറത്തും വമ്പന് കുതിപ്പ് തുടരുന്ന ചിത്രം ബോക്സ് ഓഫീസില് തരംഗം സൃഷ്ടിക്കുകയാണ്. പ്രിയദര്ശന്, നസ്ലന് എന്നിവര് പ്രധാന വേഷങ്ങള് അവതരിപ്പിച്ച ഈ ബിഗ് ബജറ്റ് ചിത്രം’ രചിച്ചു സംവിധാനം ചെയ്തിരിക്കുന്നത് ഡൊമിനിക് അരുണ് ആണ്. ചിത്രം ഗള്ഫില് റിലീസ് ചെയ്തിരിക്കുന്നത് വേഫെറര് ഫിലിംസ് തന്നെയാണ്. ഗംഭീര റിലീസാണ് ചിത്രത്തിന് മിഡില് ഈസ്റ്റില് ലഭിച്ചിരിക്കുന്നത്. മികച്ച പ്രേക്ഷക പ്രതികരണം നേടുന്ന ചിത്രത്തിന്റെ തെലുങ്ക് പതിപ്പും ഇപ്പോള് സൂപ്പര് വിജയത്തിലേക്കാണ് കുതിക്കുന്നത്.
പാന് ഇന്ത്യ തലത്തില് ശ്രദ്ധയും അഭിനന്ദനവും നേടുന്ന ചിത്രം ‘ലോക’ എന്ന് പേരുള്ള ഒരു സൂപ്പര് ഹീറോ സിനിമാറ്റിക് യൂണിവേഴ്സിലെ ആദ്യ ചിത്രമാണ്. പ്രേക്ഷകര്ക്ക് മുന്നിലേക്ക് ഒരു വമ്പന് ഫാന്റസി ലോകം തുറന്നിടുന്ന ചിത്രം, കേരളത്തിലെ പ്രശസ്തമായ ഐതിഹ്യമായ കള്ളിയങ്കാട്ട് നീലിയുടെ കഥയില് നിന്ന് പ്രചോദനം ഉള്ക്കൊണ്ട് ആണ് ഒരുക്കിയിരിക്കുന്നത്. കേരളത്തിന്റെ സംസ്കാരത്തിലും മിത്തുകളിലും ഊന്നി അവതരിപ്പിക്കുന്ന ചിത്രത്തില് ചന്ദ്ര എന്ന ടൈറ്റില് കഥാപാത്രമായി കല്യാണി പ്രിയദര്ശന് വമ്പന് കയ്യടിയാണ് നേടുന്നത്. സണ്ണി ആയി നസ്ലന്, ഇന്സ്പെക്ടര് നാചിയപ്പ ഗൗഡ ആയി സാന്ഡി എന്നിവരും മികച്ച പ്രകടനം കാഴ്ച വെച്ചു. ചന്തു സലിംകുമാര്, അരുണ് കുര്യന്, ശരത് സഭ, നിഷാന്ത് സാഗര്, വിജയരാഘവന് എന്നിവരും ചിത്രത്തിന്റെ താരനിരയിലുണ്ട്. ചിത്രത്തിലെ വമ്പന് കാമിയോ റോളുകളും പ്രേക്ഷകര്ക്ക് വലിയ രോമാഞ്ചമാണ് സമ്മാനിക്കുന്നത്.
കേരളത്തില് ഗംഭീര റിലീസായി വേഫെറര് ഫിലിംസ് എത്തിച്ച ചിത്രം റെസ്റ്റ് ഓഫ് ഇന്ത്യ മാര്ക്കറ്റില് വിതരണം ചെയ്തിരിക്കുന്നത് വമ്പന് വിതരണക്കാരാണ്. തമിഴില് എ ജി എസ് സിനിമാസ്, കര്ണാടകയില് ലൈറ്റര് ബുദ്ധ ഫിലിംസ്, നോര്ത്ത് ഇന്ത്യയില് പെന് മരുധാര്, തെലുങ്കില് സിതാര എന്റെര്റ്റൈന്മെന്റ്സ് എന്നിവരാണ് ചിത്രം വിതരണം ചെയ്തത്. ജേക്സ് ബിജോയ് ഒരുക്കിയ പശ്ചാത്തല സംഗീതം, യാനിക്ക് ബെന് ഒരുക്കിയ ഗംഭീര ആക്ഷന് രംഗങ്ങള്, നിമിഷ രവിയുടെ ദൃശ്യങ്ങള് എന്നിവ ചിത്രത്തിന്റെ ഹൈലൈറ്റ് ആയി മാറിയിട്ടുണ്ട്. ബംഗ്ലാന്റെ പ്രൊഡക്ഷന് ഡിസൈനും ചിത്രത്തെ മനോഹരമാക്കിയിട്ടുണ്ട്.
ഛായാഗ്രഹണം -നിമിഷ് രവി, സംഗീതം – ജേക്സ് ബിജോയ്, എഡിറ്റര് – ചമന് ചാക്കോ, എക്സിക്യൂട്ടീവ് പ്രൊഡ്യൂസേഴ്സ്-ജോം വര്ഗീസ്, ബിബിന് പെരുമ്പള്ളി, അഡീഷണല് തിരക്കഥ-ശാന്തി ബാലചന്ദ്രന്, പ്രൊഡക്ഷന് ഡിസൈനര്-ബംഗ്ലാന് , കലാസംവിധായകന്-ജിത്തു സെബാസ്റ്റ്യന്, മേക്കപ്പ് – റൊണക്സ് സേവ്യര്, കോസ്റ്റ്യൂം ഡിസൈനര്-മെല്വി ജെ, അര്ച്ചന റാവു, സ്റ്റില്സ്- രോഹിത് കെ സുരേഷ്, അമല് കെ സദര്, ആക്ഷന് കൊറിയോഗ്രാഫര്- യാനിക്ക് ബെന്, പ്രൊഡക്ഷന് കണ്ട്രോളര് – റിനി ദിവാകര്, വിനോഷ് കൈമള്, ചീഫ് അസോസിയേറ്റ്-സുജിത്ത് സുരേഷ്
