കീവ് : ലിയോ 16ാമന് മാര്പാപ്പയെ യുക്രൈയ്ന് സന്ദര്ശനത്തിന് ക്ഷണിച്ച് പ്രസിഡന്റ് വൊളോഡിമിര് സെലെന്സ്കി.
ഞായറാഴ്ച സെന്റ് പീറ്റേഴ്സ് ചത്വരത്തിലെ പ്രസംഗത്തില് യുക്രെയ്നിലെ സമാധാനത്തിനായി ആഹ്വാനം ചെയ്തതിനു പിന്നാലെയാണ് അദ്ദേഹത്തിന് ക്ഷണം ലഭിച്ചത്. മാര്പാപ്പയുമായി ഇന്നലെ നടത്തിയ ഫോണ് സംഭാഷണത്തിലാണ് അദ്ദേഹത്തെ യുക്രൈയ്നിലേക്കു ക്ഷണിച്ചത്. മാര്പ്പാപ്പയായി ചുമതലയേറ്റതിനു ശേഷം ഒരു രാഷ്ട്രനേതാവുമായി നടക്കുന്ന ആദ്യത്തെ സംഭാഷണമാണിത്.
യുദ്ധത്തിനിടെ റഷ്യ കൊണ്ടുപോയ ആയിരക്കണക്കിനു കുട്ടികളെ യുക്രൈയ്നിലേക്കു തിരിച്ചുകൊണ്ടുവരുന്നതില് മാര്പാപ്പയുടെ സഹായം സെലെന്സ്കി അഭ്യര്ഥിച്ചു. വെടിനിര്ത്തല് ആഹ്വാനവും തുര്ക്കിയിലെ സമാധാനചര്ച്ചയ്ക്കുള്ള സന്നദ്ധതയും ഉള്പ്പെടെ യുദ്ധം അവസാനിപ്പിക്കാനായി നടത്തുന്ന ശ്രമങ്ങളെക്കുറിച്ച് ലിയോ മാര്പാപ്പയോട് സെലെന്സ്കി വിശദീകരിച്ചു.
‘യുക്രൈയ്നിലെ ജനങ്ങളുടെ ദുരിതം എന്റെ ഹൃദയത്തിലുണ്ട്’ എന്നായിരുന്നു ഞായറാഴ്ച മാര്പാപ്പയുടെ പരാമര്ശം. മുന്ഗാമിയായ ഫ്രാന്സിസ് മാര്പാപ്പയുടേതിനെക്കാള് ശക്തമായ നിലപാടാണ് യുക്രൈയ്ന് യുദ്ധത്തിന്റെ കാര്യത്തില് ലിയോ കൈക്കൊള്ളുന്നത്.
