കല്പ്പറ്റ: വയനാട് ജില്ലയില് റെഡ് അലര്ട്ട് പ്രഖ്യാപിച്ച സാഹചര്യത്തില് വിനോദ സഞ്ചാര കേന്ദ്രങ്ങളില് നിയന്ത്രണം ഏര്പ്പെടുത്തി. എടക്കല് ഗുഹയിലേക്കുള്ള സഞ്ചാരികളുടെ പ്രവേശനം നിരോധിച്ചു. കുറുവ ദ്വീപ്, കാന്തന്പാറ, പൂക്കോട്ലേക്ക്, കര്ളാട് കേന്ദ്രങ്ങളിലെ ബോട്ടിങ് നിര്ത്തിവെച്ചു. പാര്ക്കുകള് തുറന്നു പ്രവര്ത്തിക്കുമെങ്കിലും ജില്ലയിലെ എല്ലാ സാഹസിക വിനോദങ്ങളും ജലവിനോദങ്ങളും കര്ശനമായി നിരോധിച്ചതായി ഡിടിപിസി സെക്രട്ടറി അറിയിച്ചു.
ജലനിരപ്പ് ഉയരുന്നതിനാല് കണ്ണൂര് പഴശ്ശി അണക്കെട്ടിന്റെ ഷട്ടറുകള് മെയ് 21 ബുധനാഴ്ച രാവിലെ 10 മണി മുതല് മറ്റൊരു അറിയിപ്പ് കൂടാതെ തുറന്ന് ജലവിതാനം ക്രമീകരിക്കും. വളപട്ടണം പുഴയുടെ ഇരുകരകളിലും താമസിക്കുന്നവരും പൊതുജനങ്ങളും ജാഗ്രത പാലിക്കണമെന്ന് പഴശ്ശി ജലസേചന വിഭാഗം എക്സിക്യൂട്ടീവ് എന്ജിനീയര് അറിയിച്ചു.
