തൃശൂര്: കൊടകര കുഴല്പ്പണക്കേസ് കൊച്ചിയിലെ ഇ ഡി കോടതിയിലേയ്ക്ക് മാറ്റാന് നീക്കം. കൊടകര കുഴല്പ്പണക്കേസിന്റെ ട്രയല് കോടതി മാറ്റാന് എന്ഫോഴ്സ്മെന്റ് ഡയറക്ടറേറ്റ് ഇരിങ്ങാലക്കുട സെഷന്സ് കോടതിയില് അപേക്ഷനല്കി.
കേരള പൊലീസ് രജിസ്റ്റര് ചെയ്തിരിക്കുന്ന കേസ് എറണാകുളത്തെ ഇഡിയുടെ കോടതിയിലേക്ക് മാറ്റാനാണ് ശ്രമം.
വിഷയത്തില് ഇ ഡി കേസിനൊപ്പം നിലവില് ഇരിങ്ങാലക്കുട കോടതി പരിഗണിക്കുന്ന കേസ് കൂടി പരിഗണിക്കാം എന്നതാണ് ഇഡി ഉന്നയിക്കുന്ന ആവശ്യം.
എന്നാല്, ഇഡി നീക്കത്തില് സര്ക്കാര് എതിര്പ്പ് അറിയിച്ചിരിക്കുകയാണ്. കള്ളപ്പണത്തിന്റെ ഉറവിടം അന്വേഷിക്കാന് മാത്രമാണ് ഇഡിക്ക് അധികാരം. മോഷണക്കേസ് അന്വേഷിക്കേണ്ടത് പൊലീസാണെന്ന് സ്പെഷ്യല് പ്രൊസിക്യൂട്ടര് എന് കെ ഉണ്ണികൃഷ്ണന് കോടതിയില് അറിയിച്ചു.
ബിജെപിയെ വെട്ടിലാക്കിയ കൊടകര കുഴല്പ്പണ കവര്ച്ച നടന്ന് നാലുവര്ഷം പൂര്ത്തിയാകുമ്പോഴാണ് ഇഡിയുടെ ഇത്തരത്തിലൊരു നീക്കം.
തെരഞ്ഞെടുപ്പിന് വിനിയോഗിക്കാനായി ബിജെപി കേരളത്തിലെത്തിച്ച മൂന്നരക്കോടി രൂപ കൊടകരയില് വച്ച് കവര്ന്നു എന്നായിരുന്നു ആദ്യ റിപ്പോര്ട്ട്. 2021 ഏപ്രില് മൂന്നിനു പുലര്ച്ചെ 4.40-നാണ് പണമടങ്ങുന്ന വാഹനം കൊടകരയില് തട്ടിപ്പുസംഘം കവര്ന്നത്.
