കണ്ണൂർ: കണ്ണൂർ വിളക്കോട് എംഎസ്എഫ് പ്രവർത്തകന് വെട്ടേറ്റു.ജില്ലാ പ്രവർത്തകസമിതി അംഗമായ നൈസാം പുഴക്കരയ്ക്കാണ് ആക്രമണത്തിൽ പരിക്കേറ്റത്. സംഭവത്തിന് പിന്നിൽ എസ്ഡിപിഐ പ്രവർത്തകരാണെന്ന് എംഎസ്എഫ് ആരോപിച്ചു.
ഇന്നലെ രാത്രി ഇരിട്ടിയിലായിരുന്നു ആക്രമണം നടന്നത്. പരിക്കേറ്റ നൈസാമിനെ തലശ്ശേരിയിലെ സ്വകാര്യ ആശുപത്രിയിൽ പ്രവേശിപ്പിച്ചു. നിലവിൽ പരിക്ക് ഗുരുതരമല്ലെന്നാണ് ആശുപത്രി വൃത്തങ്ങൾ അറിയിച്ചത്.
തെരഞ്ഞെടുപ്പുമായി ബന്ധപ്പെട്ട് പ്രദേശത്ത് ലീഗ്-എസ്ഡിപിഐ പ്രവർത്തകർ തമ്മിൽ നേരത്തെ തർക്കം ഉണ്ടായിരുന്നതായി റിപ്പോർട്ടുണ്ട്. ബുള്ളറ്റിലും കാറിലുമായെത്തിയ സംഘമാണ് ആക്രമണം നടത്തിയതെന്ന് നൈസാം പറഞ്ഞു.
വോട്ടെടുപ്പ് ദിവസങ്ങളിൽ വിവിധ പ്രദേശങ്ങളിൽ സംഘർഷങ്ങൾ റിപ്പോർട്ട് ചെയ്തിരുന്നു. ഇതിന്റെ തുടർച്ചയായാകാം ആക്രമണമെന്ന നിലയിലാണ് പൊലീസ് സംഭവത്തെ വിലയിരുത്തുന്നത്. സംഭവത്തിൽ അന്വേഷണം പുരോഗമിക്കുകയാണ്.
