വയനാട്: ചെറുവള്ളി എസ്റ്റേറ്റുമായി ബന്ധപ്പെട്ട് പാലാ കോടതിയുടെ വിധി സംസ്ഥാന സര്ക്കാരിന് തിരിച്ചടിയല്ലെന്ന് റവന്യൂ മന്ത്രി കെ രാജന്.
നടപടിക്രമങ്ങളിലെ വീഴ്ചയാണ് ഇപ്പോള് ഉന്നയിക്കപ്പെട്ടതെന്നും ഭൂമിയുടെ ഉടമസ്ഥാവകാശം സംബന്ധിച്ചല്ല വിധിയെന്നും അദ്ദേഹം പറഞ്ഞു.
വയനാട്ടില് നിര്മിക്കുന്ന ടൗണ്ഷിപ്പ് സന്ദര്ശിച്ച ശേഷം മാധ്യമപ്രവര്ത്തകര്ക്ക് മറുപടി നല്കുകയായിരുന്നു മന്ത്രി.
നിര്ദിഷ്ട ശബരിമല വിമാനത്താവള പദ്ധതിക്കായി സര്ക്കാര് കണ്ടുവച്ച സ്ഥലമാണ് ചെറുവള്ളി എസ്റ്റേറ്റ്. എന്നാല് സര്ക്കാര് അവകാശം ഉന്നയിച്ച 2263 ഏക്കര് സര്ക്കാര് ഭൂമിയല്ലെന്ന് വ്യക്തമാക്കിയാണ് പാലാ കോടതി ഹര്ജി തള്ളിയത്.
ഇതോടെ ശബരിമല വിമാനത്താവള പദ്ധതിയുടെ ഭാവിയും അനിശ്ചിതത്വത്തിലായി. ഇനി മേല്ക്കോടതിയില് നിന്ന് സര്ക്കാര് വാദം ശരിവച്ചാലേ ഭൂമി ഏറ്റെടുക്കലുമായി സര്ക്കാരിന് മുന്നോട്ട് പോകാനാവൂ.
എസ്റ്റേറ്റ് ഭൂമിയുമായി ബന്ധപ്പെട്ട് അയന ചാരിറ്റബിള് ട്രസ്റ്റിന്റെ വാദങ്ങള് പാലാ കോടതി ശരിവച്ചതോടെയാണിത്. എരുമേലി സൗത്ത്, മണിമല വില്ലേജുകളിലായി 2263 ഏക്കര് ഭൂമിയിലാണ് സര്ക്കാര് അവകാശം ഉന്നയിച്ചത്. ബിലിവേഴ്സ് സഭയുടെ അയന ചാരിറ്റബിള് ട്രസ്റ്റ്, ഹാരിസണ് മലയാളം എന്നിരാണ് കേസിലെ എതിര് കക്ഷികള്. 2019 ല് തുടങ്ങിയതാണ് ഈ കേസ്. ഇതിലാണ് ഇപ്പോള് സര്ക്കാരിന്റെ അവകാശവാദം കോടതി തള്ളിയത്.
