കോട്ടയം: സാമ്പത്തിക ക്രമക്കേടുകളെത്തുടർന്ന് രണ്ടുവർഷമായി പ്രതിസന്ധിയിലായ മേലമ്പാറ സഹകരണ ബാങ്കിലെ നിക്ഷേപകർ പ്രത്യക്ഷ സമരത്തിലേക്ക്. നിക്ഷേപകരുടെ കോടിക്കണക്കിന് രൂപ അനധികൃത വായ്പയായി കൈപ്പറ്റി തിരിച്ചടക്കാത്തവർക്കെതിരെ കർശന നടപടി ആവശ്യപ്പെട്ട് ഓൾ കേരള സഹകരണ ബാങ്ക് ഡെപ്പോസിറ്റേഴ്സ് ഫോറത്തിന്റെ (AKCDF) നേതൃത്വത്തിൽ നാളെ (2026 ജനുവരി 28, ബുധൻ) ഉച്ചകഴിഞ്ഞ് 3 മണിക്ക് ബാങ്ക് ഹെഡ് ഓഫീസിന് മുൻപിൽ നിക്ഷേപക ധർണ്ണയും ജാഥയും സംഘടിപ്പിക്കും. പാലാ മീഡിയ അക്കാഡമിയിൽ നടന്ന വാർത്താ സമ്മേളനത്തിലാണ് സമരസമിതി നേതാക്കൾ ഇക്കാര്യം അറിയിച്ചത്.
ബാങ്കിനെ തകർച്ചയിലാക്കിയ വൻകിട കുടിശ്ശികക്കാർക്കെതിരെ നിയമനടപടികൾ (ARC) ഫയൽ ചെയ്യുന്നതിനായി നിക്ഷേപകരുടെ നേതൃത്വത്തിൽ ‘ചട്ടിപ്പിരിവ്’ നടത്താനും, സമാഹരിക്കുന്ന തുക ബാങ്കിൽ ഏൽപ്പിക്കാനും തീരുമാനിച്ചിട്ടുണ്ട്. ബാങ്കിലെ മുഴുവൻ നിക്ഷേപകരും തങ്ങളുടെ അവകാശങ്ങൾ സംരക്ഷിക്കാനായി നടത്തുന്ന ഈ പ്രതിഷേധത്തിൽ പങ്കുചേരണമെന്ന് സമരസമിതി അഭ്യർത്ഥിച്ചു. വാർത്താ സമ്മേളനത്തിൽ മേലമ്പാറ ബാങ്ക് നിക്ഷേപക കൂട്ടായ്മ നേതാക്കളായ സോജി കുര്യൻ മാറാമറ്റം, ജോബി മുട്ടത്തുകുന്നേൽ, ജോബി ഫ്രാൻസിസ് പൂവത്തോലിൽ, റോയി വെള്ളരിങ്ങാട്ട് എന്നിവർ പങ്കെടുത്തു.
