കണ്ണൂര്: പേരാവൂരില് മത്സരിക്കുന്ന കെപിസിസി അധ്യക്ഷന് സണ്ണി ജോസഫിനെതിരെ പോസ്റ്റര് പ്രതിഷേധവുമായി കെ സുധാകരന് അനുകൂലികള്. സണ്ണി ജോസഫിന്റെ ബോര്ഡിന് മുകളില് പോസ്റ്ററൊട്ടിച്ചാണ് താക്കീത്. കെ എസ് ബ്രിഗേഡിന്റെ പേരിലുള്ള പോസ്റ്ററില് ‘നന്ദി ഇല്ലെങ്കിലും നന്ദികേട് ആവരുത് സണ്ണീ… തിരിച്ചടി നേരിടേണ്ടിവരും… ശ്രീ കെ സുധാകരന് അഭിവാദ്യങ്ങള്’ എന്നാണ് പറയുന്നത്.
പേരാവൂര് മണ്ഡലത്തിലെ അയ്യന്കുന്നിലാണ് പോസ്റ്റര് പ്രത്യക്ഷപ്പെട്ടത്. ഇന്നലെ രാത്രി കണ്ണൂര് ഡിസിസി പരിസരത്തേക്ക് കെ സുധാകരന് അനുകൂലികളുടെ പന്തംകൊളുത്തി പ്രകടനവും നടന്നിരുന്നു. ‘കണ്ണേ കരളേ കെഎസേ, നമ്മുടെ ഓമന നേതാവെ, അല്ലറ ചില്ലറ നേതാവല്ല, ഇതാണ് നമ്മുടെ നേതാവ്’ തുടങ്ങിയ മുദ്രാവാക്യങ്ങള് വിളിച്ചുകൊണ്ടായിരുന്നു സുധാകരന് അനുകൂലികളുടെ പ്രകടനം.
