കൊൽക്കത്ത: പശ്ചിമ ബംഗാൾ നിയമസഭാ തിരഞ്ഞെടുപ്പ് അടുക്കുമ്പോൾ ബിജെപിക്കെതിരെ ആരോപണവുമായി തൃണമൂൽ കോൺഗ്രസ്. ഗുജറാത്തിലെ സൂറത്തിൽ നിന്ന് ബംഗാളിലേക്ക് വോട്ടർമാരെ എത്തിക്കാൻ ബിജെപി സൗജന്യ തീവണ്ടി സൗകര്യങ്ങൾ ഏർപ്പെടുത്തിയെന്നാണ് ആരോപണം. വോട്ടെടുപ്പ് ആരംഭിക്കാനിരിക്കെ രാഷ്ട്രീയ വൃത്തങ്ങളിൽ വലിയ ചർച്ചയായിരിക്കുകയാണ് ഈ വിഷയം. തിരഞ്ഞെടുപ്പിന്റെ സമയത്ത് ഇത്തരത്തിൽ വോട്ടർമാർക്ക് സൗജന്യ യാത്രയും ഭക്ഷണവും നൽകുന്നത് തിരഞ്ഞെടുപ്പ് നിയമങ്ങളുടെ ലംഘനമാണെന്നും, ഇതിലൂടെ വോട്ടർമാരെ ബിജെപി സ്വാധീനിക്കാൻ ശ്രമിക്കുകയാണെന്നും ചൂണ്ടിക്കാട്ടി തിരഞ്ഞെടുപ്പ് കമ്മീഷന് പരാതി നൽകി.