തൃശ്ശൂർ: മുണ്ടത്തിക്കോട് ഉണ്ടായ വെടിക്കെട്ട് ദുരന്തത്തെ തുടർന്ന് കുട്ടംകുളം സെയ്ന്റ് ജോൺ ദി ഇവാഞ്ചലിസ്റ്റ് പള്ളിയിലെ ആദ്യ പെരുന്നാൾ ഉപേക്ഷിച്ചു. അപകടം നടന്ന സ്ഥലത്തുനിന്ന് ഏകദേശം രണ്ട് കിലോമീറ്റർ മാത്രം അകലെയാണ് ഈ പള്ളി. പഴയ പള്ളിയിൽ നിന്ന് മാറി പുതിയതായി പണിത പള്ളിയുടെ വെഞ്ചരിപ്പ് കഴിഞ്ഞിട്ട് കുറച്ച് ദിവസങ്ങൾ മാത്രമാണ് ആയത്. അതിനിടെ തന്നെ ആദ്യ പെരുന്നാൾ നടത്തുന്നതിനിടയിലാണ് ദുരന്തം സംഭവിച്ചത്.
തിങ്കളാഴ്ച മുതൽ ബുധനാഴ്ച വരെ ആയിരുന്നു പെരുന്നാൾ നടത്താൻ പദ്ധതിയിട്ടിരുന്നത്. എന്നാൽ ചൊവ്വാഴ്ച ഉച്ചയ്ക്ക് ശേഷം അപകടം ഉണ്ടായതോടെ ആഘോഷങ്ങൾ നിർത്തുകയായിരുന്നു. ചൊവ്വാഴ്ച വൈകുന്നേരം നടത്താനിരുന്ന പ്രദക്ഷിണം, വെടിക്കെട്ട്, ബുധനാഴ്ചയ്ക്ക് നിശ്ചയിച്ചിരുന്ന ഗാനമേളയും കലാപരിപാടികളും എല്ലാം മാറ്റിവെച്ചു.
പള്ളിയോട് ചേർന്ന പുതിയ കെട്ടിടത്തിന്റെ ചില ജനലുകൾ തകർന്നു. പഴയ പള്ളിയിലും ചെറിയ കേടുപാടുകൾ ഉണ്ടായി. അപകടം സംഭവിച്ച സമയത്ത് പള്ളിയിൽ അധികം ആളുകൾ ഉണ്ടായിരുന്നില്ല. “ദുരന്തത്തിൽപ്പെട്ടവർ എല്ലാവരും നമ്മുക്ക് പരിചയമുള്ളവരാണ്. സുഹൃത്തുക്കളും പള്ളിയിലേക്ക് പതിവായി വരുന്നവരുമാണ്.” എന്ന് വികാരി ഫാ. സോബിൻ പായിക്കാട്ട് പറഞ്ഞു:
