നിയമസഭാ തെരഞ്ഞെടുപ്പിൽ വോട്ടെടുപ്പ് കഴിഞ്ഞതിന് ശേഷം ഏറ്റവും നിരാശയിൽ കഴിയുന്നവർ ആരെന്ന് ചോദിച്ചാൽ അത് ബിജെപിക്കാരാണെന്ന് പറയാം. അത്രയേറേ ആത്മവിശ്വാസത്തോടെ വന്നിട്ട് ഒരു സീറ്റെങ്കിലും കിട്ടിയാൽ ഭാഗ്യം എന്ന നിലയിൽ എത്തി നിൽക്കുകയാണ് നിലവിൽ ബിജെപി. കോൺഗ്രസിലേക്ക് ചായുമെന്ന് ഭൂരിപക്ഷം സർവേകളും പറയുന്ന പാലക്കാട് ഇപ്പോഴും വിജയപ്രതീക്ഷ കൊണ്ടുനടക്കുകയാണ് ബിജെപിയെന്ന് പുറത്ത് വരുന്ന റിപ്പോർട്ടുകൾ സൂചിപ്പിക്കുന്നു.
പാലക്കാട് ജില്ലയിൽ വൻ മുന്നേറ്റമാണ് പാർട്ടിയിലെ ഒരു വിഭാഗം പ്രതീക്ഷിക്കുന്നത്. ജില്ലയിലെ പ്രമുഖ മണ്ഡലങ്ങളായ പാലക്കാടും മലമ്പുഴയും കേന്ദ്രീകരിച്ച് പാർട്ടി നടത്തിയ പ്രത്യേക അവലോകന യോഗത്തിലാണ് പ്രചരണ കാലത്തെ കർമ്മപദ്ധതികൾ വിലയിരുത്തിയത്. ബിജെപി പാലക്കാട് ഈസ്റ്റ് ജില്ലാ കമ്മിറ്റിയുടെ നേതൃത്വത്തിൽ നടന്ന നിയോജകമണ്ഡലം അവലോകന യോഗം സംസ്ഥാന ജനറൽ സെക്രട്ടറി എം.ടി. രമേശ് ഉദ്ഘാടനം ചെയ്തു.
വെറുമൊരു രാഷ്ട്രീയ യോഗത്തിനപ്പുറം, ഓരോ ബൂത്തിലും നടന്ന പ്രവർത്തനങ്ങളെ വസ്തുനിഷ്ഠമായി വിലയിരുത്തുന്ന രീതിയിലായിരുന്നു യോഗം സംഘടിപ്പിച്ചത്. പാർട്ടി മുൻകൂട്ടി തയാറാക്കിയ പ്രത്യേക ചോദ്യാവലിയുടെ അടിസ്ഥാനത്തിലായിരുന്നു ഓരോ മണ്ഡലത്തിലെയും പ്രവർത്തനങ്ങൾ അളന്നത്. പ്രധാനമായും താഴെ പറയുന്ന ഘടകങ്ങൾ യോഗം സൂക്ഷ്മമായി പരിശോധിച്ചു:
ഇലക്ഷൻ മാനേജ്മെന്റ്: കോർ ടീം യോഗങ്ങളുടെ കാര്യക്ഷമതയും മാനേജ്മെന്റ് കമ്മിറ്റിയുടെ ഇടപെടലുകളും.
ബൂത്ത് തല പ്രവർത്തനം: കുടുംബയോഗങ്ങൾ, വീടുകൾ കയറിയുള്ള സമ്പർക്കം, മഹിളാ-യുവജന സമ്പർക്ക പരിപാടികൾ എന്നിവയുടെ പുരോഗതി.
ഡിജിറ്റൽ ക്യാമ്പയിൻ: സാമൂഹിക മാധ്യമങ്ങളിലൂടെ വോട്ടർമാരിലേക്ക് എത്തുന്നതിൽ പ്രവർത്തകർ എത്രത്തോളം വിജയിച്ചു എന്ന വിലയിരുത്തൽ.
വോട്ട് ക്രമീകരണം: പോസ്റ്റൽ വോട്ടുകളുടെ കൃത്യമായ വിനിയോഗവും വോട്ടർ പട്ടികയിലെ ക്രമീകരണങ്ങളും.
പാലക്കാട്, മലമ്പുഴ മണ്ഡലങ്ങളിൽ പാർട്ടിക്ക് ഉറച്ച വിജയപ്രതീക്ഷയാണുള്ളതെന്ന് നേതൃത്വം വ്യക്തമാക്കി. ഈ മണ്ഡലങ്ങളിൽ വോട്ടർമാരുടെ പ്രതികരണം അനുകൂലമാണെന്നും സംഘടനാ സംവിധാനം ശക്തമാണെന്നും യോഗം വിലയിരുത്തി. യുഡിഎഫ്, എൽഡിഎഫ് മുന്നണികളുടെ പ്രവർത്തനശൈലിയും ഓരോ മണ്ഡലത്തിലും അവർക്ക് ലഭിക്കാവുന്ന വോട്ടുകളും സംബന്ധിച്ച് പാർട്ടി കൃത്യമായ കണക്കെടുപ്പ് നടത്തിയിട്ടുണ്ട്. നെന്മാറയിൽ സഖ്യകക്ഷിയായ ബിഡിജെഎസ് നടത്തിയ പ്രവർത്തനങ്ങളും യോഗത്തിൽ ചർച്ചയായി. ജില്ലയിലെ മറ്റ് മണ്ഡലങ്ങളിലും വോട്ട് വിഹിതം ഗണ്യമായി വർധിപ്പിക്കാൻ കഴിയുമെന്ന ആത്മവിശ്വാസത്തിലാണ് നേതൃത്വം. മലമ്പുഴയിൽ കാലങ്ങളായി രണ്ടാമതാണ് ബിജെപി. ഒന്നാഞ്ഞ് പിടിച്ചാൽ ഇങ്ങ് പോരുമെന്ന് ബിജെപി വിശ്വസിക്കുന്നതിൽ തെറ്റില്ലെങ്കിലും വിഎസ് പാകിയ ഇടതിന്റെ വേര് ആഴ്ന്നിറങ്ങിയ മണ്ണിൽ എൽഡിഎഫിന് തന്നെയാണ് വിജയ സാധ്യത
പാലക്കാട് ജില്ലയിൽ ബിജെപിയുടെ രാഷ്ട്രീയ സ്വാധീനം വർധിച്ചുവരുന്ന സാഹചര്യത്തിൽ, ഈ അവലോകന യോഗം പ്രവർത്തകർക്ക് വലിയ ആവേശമാണ് പകർന്നിരിക്കുന്നത്. താഴെത്തട്ടിലുള്ള പ്രവർത്തനങ്ങളിലെ വീഴ്ചകൾ പരിഹരിക്കാനും അവസാനവട്ട പ്രചാരണ തന്ത്രങ്ങൾ മെനയാനും എം.ടി. രമേശിന്റെ നേതൃത്വത്തിൽ നടന്ന ഈ യോഗം സഹായിച്ചു. പാലക്കാട്ടെ രാഷ്ട്രീയ ചിത്രം മാറുമോ എന്നത് വോട്ടെണ്ണൽ ഫലം വരുന്നതോടെ വ്യക്തമാകും.
