മുസാഫർനഗർ: സാമൂഹ്യ മാധ്യമങ്ങളിൽ വൈറലാവാൻ 200 അടി ഉയരത്തിലുള്ള കുടിവെള്ള സംഭരണി സ്വിമ്മിംഗ് പൂളാക്കി യുവാക്കൾ. ഉത്തർ പ്രദേശിലെ മുസാഫർനഗർ ജില്ലയിലെ ബുധാന എന്ന സ്ഥലത്താണ് സംഭവം. ഗ്രാമത്തിലേക്ക് മുഴുവൻ കുടിവെള്ളം എത്തിക്കുന്ന ഈ ടാങ്കിനെ യുവാക്കൾ ഒരു സ്വിമ്മിംഗ് പൂൾ പോലെയാണ് ഉപയോഗിക്കുന്നത്. യാതൊരു സുരക്ഷാ സംവിധാനങ്ങളുമില്ലാതെ ഇത്രയും ഉയരത്തിൽ യുവാക്കൾ കയറിയത്. നൂറുകണക്കിന് കുടുംബങ്ങൾ കുടിക്കാനും പാചകം ചെയ്യാനും ഈ ടാങ്കിലെ വെള്ളമാണ് ഉപയോഗിക്കുന്നത്. ഈ സാഹചര്യത്തിൽ, യുവാക്കൾ ടാങ്കിലിറങ്ങി കുളിക്കുന്നത് വഴി പലതരം ത്വക്ക് രോഗങ്ങളും അണുബാധകളും മറ്റ് പകർച്ചവ്യാധികളും പടർന്നുപിടിക്കാനുള്ള ആശങ്കയാണ് നാട്ടുകാർ പങ്കുവയ്ക്കുന്നത്. പൊതുമുതൽ ഇത്ര നിരുത്തരവാദപരമായി ഉപയോഗിക്കുന്നത് നാട്ടുകാരെ പ്രകോപിതരാക്കിയിട്ടുണ്ട്.