ന്യൂഡല്ഹി: ഇന്ന് രാവിലെയാണ് ഇടിത്തീ പോലെ വാണിജ്യ പാചകവാതകത്തിന് ആയിരം രൂപയോളം ഒറ്റയടിക്ക് കൂട്ടിയത്. തെരഞ്ഞെടുപ്പ് കഴിഞ്ഞതിനാല് കൂടുതല് ഇരുട്ടടികള് വരും ദിവസങ്ങളില് ഉണ്ടാകുമെന്ന് ഉറപ്പായി കഴിഞ്ഞു. പശ്ചിമേഷ്യന് സംഘര്ഷത്തിന്റെ പശ്ചാത്തലത്തില് എണ്ണവില കുത്തനെ ഉയര്ന്നതിനെ തുടര്ന്ന് ഉണ്ടായ വര്ധിച്ച ഊര്ജ്ജ ചെലവ് ഉപഭോക്താക്കള്ക്ക് കൈമാറേണ്ടത് അനിവാര്യമാണെന്ന് കേന്ദ്രസര്ക്കാര് പറയുന്നു.
കേന്ദ്ര ധനകാര്യ മന്ത്രാലയത്തിന്റെ പ്രതിമാസ സാമ്പത്തിക അവലോകന റിപ്പോര്ട്ടിലാണ് ഇന്ധനവില ഉയര്ത്തേണ്ടതിന്റെ ആവശ്യകത ചൂണ്ടിക്കാണിക്കുന്നത്. ‘ചില രാജ്യങ്ങള് ഇതിനോടകം തന്നെ വില വര്ധനയുടെ ഭാരം ഉപഭോക്താക്കളിലേക്ക് കൈമാറാന് തുടങ്ങിയിട്ടുണ്ട്. മറ്റു ചിലര് ഇതുവരെ അത് ചെയ്തിട്ടില്ല. എന്നാല് ഇത് അനിവാര്യമാണ്,’- മന്ത്രാലയം പറഞ്ഞു. വിതരണ തടസ്സങ്ങള് നേരിടുന്ന സമയത്ത് ഉപഭോഗം കുറയ്ക്കേണ്ടതുണ്ടെന്നും അല്ലാത്തപക്ഷം രാജ്യങ്ങള് ഊര്ജ്ജ വിതരണത്തിന് വലിയ വില നല്കേണ്ടി വരുമെന്നും റിപ്പോര്ട്ട് കൂട്ടിച്ചേര്ത്തു.
മാര്ച്ചില് ബാരലിന് ശരാശരി 113 ഡോളറായിരുന്നു വില. ഏപ്രിലില് ഇത് 115 ഡോളറിന് അടുത്തെത്തി. വില്പ്പനയില് പെട്രോളിനും ഡീസലിനും യഥാക്രമം ലിറ്ററിന് 14 രൂപയും 18 രൂപയും എന്ന നിലയില് വിതരണ കമ്പനികള് നഷ്ടം നേരിടുന്നതായും റിപ്പോര്ട്ടുകള് ചൂണ്ടിക്കാണിക്കുന്നു.
