ഇടുക്കി: ഇടുക്കി പൂപ്പാറയിൽ പന്നിയാർ പുഴ കയ്യേറി നിർമിച്ച കെട്ടിടങ്ങൾ പൊളിച്ചുനീക്കൽ നടപടികൾ ആരംഭിച്ചു. പ്രദേശത്ത് നിർമിച്ചിരുന്ന ഒരു ക്ഷേത്രവും ഒരു പള്ളിയും ഉൾപ്പെടെ കെട്ടിടങ്ങളാണ് പൊളിക്കുന്നത്. ഇന്ന് രാവിലെ മുതലാണ് കയ്യേറ്റമായി കണ്ടെത്തിയ നിർമ്മിതികൾ നീക്കം ചെയ്യുന്നത് ആരംഭിച്ചത്.
ആകെ 88 കെട്ടിടങ്ങളാണ് പൊളിച്ചുനീക്കേണ്ടത്. ഇതിൽ 56 കെട്ടിടങ്ങൾ ഉടമകൾ തന്നെ പൊളിച്ചുനീക്കുമെന്നാണ് അറിയിച്ചിരിക്കുന്നത്. ശേഷിക്കുന്ന കെട്ടിടങ്ങൾ റവന്യു വകുപ്പ് നേരിട്ട് പൊളിച്ചുനീക്കും.
സംഘർഷ സാധ്യത കണക്കിലെടുത്ത് ശാന്തൻപാറ പോലീസ് സ്റ്റേഷൻ പരിധിയിൽ നിരോധനാജ്ഞ പ്രഖ്യാപിച്ചിട്ടുണ്ട്.
ജില്ലാ കലക്ടർ ഡോ. ദിനേശൻ ചെറുവാട്ട് അറിയിച്ചു പ്രകാരം, 88 കെട്ടിടങ്ങളും പൂർണമായി നീക്കം ചെയ്യും. പുനരധിവാസം ആവശ്യമായ 12 കുടുംബങ്ങൾക്ക് സർക്കാർ സഹായം നൽകും. ദുരന്തനിവാരണത്തിന്റെ ഭാഗമായാണ് നടപടിയെന്നും, കയ്യേറ്റത്തിൽ പ്രാദേശിക ഭരണകൂടത്തിന്റെ പങ്ക് ഉണ്ടോയെന്ന് പരിശോധിച്ച് ഉത്തരവാദികൾക്കെതിരെ നടപടി സ്വീകരിക്കുമെന്നും കലക്ടർ വ്യക്തമാക്കി.
