തിരുവനന്തപുരം:കേരളത്തിന്റെ അടുത്ത മുഖ്യമന്ത്രിയെ നിശ്ചയിക്കുന്നതിനുള്ള നിർണ്ണായകമായ ചർച്ചകൾ പുരോഗമിക്കവെ, എം.എൽ.എമാരുടെ പിന്തുണയുടെ കാര്യത്തിൽ കോൺഗ്രസിലെ മൂന്ന് പ്രമുഖ ഗ്രൂപ്പുകളും തങ്ങളുടെ അവകാശവാദങ്ങൾ ശക്തമാക്കിയിരിക്കുകയാണ്. എം.എൽ.എമാരുടെ എണ്ണത്തെ ചൊല്ലി വി.ഡി. സതീശൻ, കെ.സി. വേണുഗോപാൽ, രമേശ് ചെന്നിത്തല പക്ഷങ്ങൾ വ്യത്യസ്തമായ കണക്കുകളാണ് മുന്നോട്ടുവെക്കുന്നത്. 45 എം.എൽ.എമാരുടെ പിന്തുണ തങ്ങൾക്കുണ്ടെന്ന് കെ.സി. വേണുഗോപാൽ വിഭാഗം അവകാശപ്പെടുമ്പോൾ, വി.ഡി. സതീശനെ 34 എം.എൽ.എമാർ പിന്തുണയ്ക്കുന്നു എന്നാണ് അദ്ദേഹത്തിന്റെ അനുയായികൾ വ്യക്തമാക്കുന്നത്. എന്നാൽ 24 എം.എൽ.എമാരുടെ പിന്തുണ തങ്ങൾക്കുണ്ടെന്നാണ് രമേശ് ചെന്നിത്തല അനുകൂലികളുടെ വാദം. ഇതോടെ മുഖ്യമന്ത്രി പദത്തിലേക്കുള്ള മത്സരം പാർട്ടിക്കുള്ളിൽ തീപാറുന്ന പോരാട്ടമായി മാറിയിരിക്കുകയാണ്.

മുഖ്യമന്ത്രിയെ തിരഞ്ഞെടുക്കുന്നതിനുള്ള ആദ്യഘട്ട നടപടിക്രമങ്ങൾ പൂർത്തിയായതായി എ.ഐ.സി.സി നിരീക്ഷകൻ അജയ് മാക്കൻ അറിയിച്ചു. എം.എൽ.എമാരുമായി നടത്തിയ വ്യക്തിഗത കൂടിക്കാഴ്ചകൾക്ക് ശേഷം തിരുവനന്തപുരത്ത് മാധ്യമങ്ങളോട് സംസാരിക്കുകയായിരുന്നു അദ്ദേഹം. ഓരോ എം.എൽ.എയും ആരെയാണ് പിന്തുണച്ചത് എന്ന കാര്യം പരസ്യമായി വെളിപ്പെടുത്താൻ സാധിക്കില്ലെന്നും, നേതാക്കളുടെ അഭിപ്രായങ്ങൾ കൃത്യമായി ഹൈക്കമാൻഡിനെ ബോധ്യപ്പെടുത്തുമെന്നും അദ്ദേഹം വ്യക്തമാക്കി. നിരീക്ഷകരുടെ റിപ്പോർട്ട് ലഭിക്കുന്നതോടെ ഹൈക്കമാൻഡ് അന്തിമ തീരുമാനത്തിലേക്ക് കടക്കും. കേരളത്തിന്റെ മുഖ്യമന്ത്രി ആരാണെന്ന കാര്യത്തിൽ വരും ദിവസങ്ങളിൽ കൂടുതൽ ചർച്ചകൾ നടക്കുമെന്നും വരാനിരിക്കുന്ന ഞായറാഴ്ചയോടെ ഇക്കാര്യത്തിൽ ഔദ്യോഗികമായ പ്രഖ്യാപനമുണ്ടാകുമെന്നുമാണ് ഇപ്പോൾ പുറത്തുവരുന്ന സൂചനകൾ.