ചെന്നൈ: തമിഴ്നാട് മുഖ്യമന്ത്രിയായി ജോസഫ് വിജയ് സത്യപ്രതിജ്ഞ ചെയ്ത് അധികാരമേൽക്കുന്ന ചടങ്ങിന് ലോക്സഭാ പ്രതിപക്ഷ നേതാവ് രാഹുൽ ഗാന്ധിയും സാക്ഷിയായി എത്തി. പതിറ്റാണ്ടുകൾക്ക് ശേഷം തമിഴ്നാട്ടിൽ കോൺഗ്രസ് മന്ത്രിസഭയുടെ ഭാഗമാകുന്നുവെന്നതാണ് ഈ രാഷ്ട്രീയ മാറ്റത്തിന്റെ പ്രധാന പ്രത്യേകത.
നാല് പതിറ്റാണ്ടിലേറെ നീണ്ടുനിന്ന കോൺഗ്രസ്–ഡിഎംകെ സഖ്യം ഉപേക്ഷിച്ചാണ് തിരഞ്ഞെടുപ്പ് ഫലത്തിന് പിന്നാലെ കോൺഗ്രസ് ടിവികെ നേതാവ് വിജയ് നയിക്കുന്ന പാർട്ടിയുമായി സഖ്യം രൂപീകരിച്ചത്. ഇതോടെ മുൻ സഖ്യകക്ഷിയായ ഡിഎംകെ കോൺഗ്രസിനെതിരെ കടുത്ത വിമർശനവുമായി രംഗത്തെത്തി. കോൺഗ്രസ് ‘പിന്നിൽ നിന്ന് കുത്തി’ എന്ന തരത്തിലുള്ള ആരോപണങ്ങളാണ് ഡിഎംകെ ഉയർത്തിയത്.
എങ്കിലും ഭാവി രാഷ്ട്രീയ കണക്കുകൂട്ടലുകളുടെ അടിസ്ഥാനത്തിലാണ് കോൺഗ്രസ് തമിഴ്നാട്ടിൽ പുതിയ നീക്കം നടത്തിയതെന്നാണ് വിലയിരുത്തൽ. ഇതിന്റെ ഭാഗമായി വിജയ് നേതൃത്വം നൽകുന്ന ടിവികെ യുമായി സഖ്യം രൂപീകരിച്ചു. ദക്ഷിണേന്ത്യയിൽ വിശ്വസിക്കാവുന്ന ഒരു മതേതര രാഷ്ട്രീയ ധ്രുവമായി വിജയ് മാറുമെന്ന പ്രതീക്ഷയാണ് രാഹുൽ ഗാന്ധിക്ക് ഉള്ളതെന്നും റിപ്പോർട്ടുകൾ പറയുന്നു.
മുൻപ് ഡിഎംകെ സർക്കാരിൽ കോൺഗ്രസിന് മന്ത്രിസഭാ പ്രാതിനിധ്യം ലഭിക്കാതിരുന്നത് പാർട്ടിക്കുള്ളിൽ അസന്തോഷം സൃഷ്ടിച്ചിരുന്നു. പുതിയ സഖ്യത്തിലൂടെ തമിഴ്നാട്ടിൽ സംഘടനാ ശക്തി വർധിപ്പിക്കാനാകുമെന്നാണ് കോൺഗ്രസ് നേതൃത്വത്തിന്റെ പ്രതീക്ഷ.
വിജയ്ക്കും കോൺഗ്രസിനും ഇടയിൽ പഴയൊരു ബന്ധവുമുണ്ട്. 2009-ൽ വിജയ് ഡൽഹിയിൽ രാഹുൽ ഗാന്ധിയുമായി കൂടിക്കാഴ്ച നടത്തിയിരുന്നു. അന്ന് അദ്ദേഹം കോൺഗ്രസിൽ ചേരുമെന്ന അഭ്യൂഹങ്ങളും ഉയർന്നിരുന്നു. എന്നാൽ അത് വെറും മര്യാദാ സന്ദർശനമായിരുന്നുവെന്നാണ് പിന്നീട് വിജയ് വ്യക്തമാക്കിയിരുന്നത്.
ഇപ്പോൾ വിജയ് നയിക്കുന്ന സർക്കാരിൽ കോൺഗ്രസ് പങ്കാളിയായിരിക്കുകയാണ്. രാഷ്ട്രീയമായി കഠിനമായ സാഹചര്യങ്ങളിൽ പിന്തുണ നൽകിയ രാഹുൽ ഗാന്ധിയെയും കോൺഗ്രസ് നേതാക്കളെയും വിജയ് നന്ദിയോടെ ഓർത്ത്, രാഹുലിനെ തന്റെ “സഹോദരൻ” എന്നും വിശേഷിപ്പിച്ചു.
തിരഞ്ഞെടുപ്പ് പ്രചാരണ കാലത്ത് ഡിഎംകെ-കോൺഗ്രസ് ബന്ധത്തിൽ സീറ്റ് വിഭജനവും അധികാര പങ്കിടലും സംബന്ധിച്ച തർക്കങ്ങൾ നിലനിന്നിരുന്നു. മന്ത്രിസഭയിൽ പ്രാതിനിധ്യം ആവശ്യപ്പെട്ട കോൺഗ്രസിന്റെ ആവശ്യം ഡിഎംകെ പലതവണ നിരസിച്ചതും അസ്വാരസ്യങ്ങൾക്ക് കാരണമായി. ഇതിന് പിന്നാലെയാണ് തിരഞ്ഞെടുപ്പ് ഫലത്തിനു ശേഷം കോൺഗ്രസ് പുതിയ രാഷ്ട്രീയ പരീക്ഷണം ആരംഭിച്ചത്.
ഈ സഖ്യം വരാനിരിക്കുന്ന തദ്ദേശ തെരഞ്ഞെടുപ്പുകളിലും ലോക്സഭാ തെരഞ്ഞെടുപ്പിലും തുടരുമെന്നാണ് രാഷ്ട്രീയ നിരീക്ഷകർ വിലയിരുത്തുന്നത്. വിജയ്–രാഹുൽ ഗാന്ധി കൂട്ടുകെട്ട് തമിഴ്നാട് രാഷ്ട്രീയത്തിലെ പുതിയ ശക്തി സമവാക്യങ്ങൾ രൂപപ്പെടുത്തുന്നുവെന്നതാണ് നിലവിലെ രാഷ്ട്രീയ വിലയിരുത്തൽ.
