തിരുവനന്തപുരം: പൊതുവിപണിയിൽ നിന്ന് 1800 കോടി രൂപ കൂടി കടമെടുക്കാൻ കേരള സർക്കാർ തീരുമാനം എടുത്തു. ഡിസംബർ വരെ 23,000 കോടി രൂപ കടമെടുക്കാൻ കേന്ദ്ര സർക്കാർ അനുമതി നൽകിയിട്ടുണ്ട്. വി.ഡി. സതീശൻയുടെ നേതൃത്വത്തിലുള്ള യുഡിഎഫ് സർക്കാർ അധികാരത്തിലെത്തിയതിന് ശേഷമുള്ള ആദ്യ വലിയ കടമെടുക്കലാണിത്. ഈ മാസം 12ന് സർക്കാർ 2800 കോടി രൂപയും കടമെടുത്തിരുന്നു.
ജീവനക്കാരുടെ ശമ്പളം, പെൻഷൻ, ക്ഷേമപെൻഷൻ എന്നിവ നൽകുന്നതിനും പുതിയ ആനുകൂല്യങ്ങൾ നടപ്പാക്കുന്നതിനുമാണ് സർക്കാർ വീണ്ടും വായ്പയെടുക്കുന്നത്. റിസർവ് ബാങ്ക് വഴി ഇറക്കുന്ന കടപ്പത്രങ്ങളുടെ ലേലം മേയ് 26ന് നടക്കും. സാമൂഹ്യസുരക്ഷാ പെൻഷൻ വിതരണം നടത്തുന്നതിനായി രൂപീകരിച്ച കേരള സോഷ്യൽ സെക്യുരിറ്റി പെൻഷൻ ലിമിറ്റഡിന് 6000 കോടി രൂപയുടെ സർക്കാർ ഗ്യാരന്റിയും അനുവദിച്ചു. ഇതുപയോഗിച്ച് കെ.എഫ്.സിയിൽ നിന്ന് 500 കോടിയും കെ.എസ്.എഫ്.ഇയിൽ നിന്ന് 3070 കോടിയും വായ്പ എടുക്കാനാണ് പദ്ധതി.
നാലുമാസത്തെ ക്ഷേമപെൻഷൻ കുടിശിക നൽകാൻ ഏകദേശം 3600 കോടി രൂപ ആവശ്യമാണ്. അതിനായാണ് ഈ വായ്പ ക്രമീകരണം. അതേസമയം, കഴിഞ്ഞ പത്ത് വർഷത്തെ ഇടതുമുന്നണി ഭരണകാലത്തെ സംസ്ഥാനത്തിന്റെ സാമ്പത്തിക സ്ഥിതി പരിശോധിക്കാൻ വിദഗ്ധ സമിതിയെ സർക്കാർ നിയോഗിച്ചു. മുൻ കാബിനറ്റ് സെക്രട്ടറിയും ആസൂത്രണ ബോർഡ് ഉപാധ്യക്ഷനുമായ ഡോ. കെ.എം. ചന്ദ്രശേഖരൻ ആണ് സമിതിയുടെ അധ്യക്ഷൻ. പുതിയ സംസ്ഥാന ബജറ്റ് ജൂൺ 5ന് അവതരിപ്പിക്കും. അതിന് മുമ്പായി സംസ്ഥാനത്തിന്റെ സാമ്പത്തിക അവസ്ഥയെ കുറിച്ചുള്ള ധവളപത്രം പുറത്തിറങ്ങുമെന്നാണ് വിവരം.
