ലക്നൗ: ഐപിഎല്ലിൽ ലക്നൗ സൂപ്പർ ജയന്‍റസിന്‍റെ ടീമിന്റെ നായകസ്ഥാനം വിക്കറ്റ് കീപ്പർ ബാറ്റർ റിഷഭ് പന്ത് ഒഴിഞ്ഞു. 14 മത്സരങ്ങളിൽ വെറും നാല് ജയവുമായി ടീം അവസാന സ്ഥാനത്ത് ഫിനിഷ് ചെയ്തതിന് പിന്നാലെയാണ് തീരുമാനം.
നായകസ്ഥാനം ഒഴിയണമെന്ന തന്റെ അഭ്യർത്ഥന ഫ്രാഞ്ചൈസി അംഗീകരിച്ചതായി ടീം മാനേജ്മെന്റ് അറിയിച്ചു. ടീമിന്റെ ഡയറക്ടർ ടോം മൂഡി, പന്തിന്റെ തീരുമാനത്തെ മാനിക്കുന്നതായും ടീമിനെ പുനർനിർമിക്കുന്നതിലാണ് ഇനി ശ്രദ്ധയെന്നും വ്യക്തമാക്കി.
2025 മെഗാ ലേലത്തിൽ 27 കോടി രൂപയ്ക്ക് ലക്നൗ സ്വന്തമാക്കിയ പന്തിനെ തന്നെ നായകനാക്കിയിരുന്നു. എന്നാൽ രണ്ട് സീസണുകളിലായി ബാറ്റിങ്ങിലും ക്യാപ്റ്റൻസിയിലും പ്രതീക്ഷിച്ച പ്രകടനം കാഴ്ചവെക്കാനായില്ല.
പുതിയ നായകനെ കണ്ടെത്തുന്നത് ടീമിന് വലിയ വെല്ലുവിളിയാകുമെന്ന് വിലയിരുത്തുന്നു. എയ്ഡൻ മാർക്രം, മിച്ചൽ മാർഷ്, നിക്കോളാസ് പൂരൻ തുടങ്ങിയവരെ പരിഗണിക്കുന്നതായി റിപ്പോർട്ടുകളുണ്ട്. റിഷഭ് പന്ത് അടുത്ത സീസണിലും ടീമിൽ തുടരുമോ എന്നതിലും ഇനി വ്യക്തത വരാനുണ്ട്.
