തിരുവനന്തപുരം: നവകേരള യാത്രയ്ക്കിടെ ആലപ്പുഴയിൽ യൂത്ത് കോൺഗ്രസ് പ്രവർത്തകരെ മുൻ മുഖ്യമന്ത്രിയുടെ സുരക്ഷാ ഉദ്യോഗസ്ഥർ മർദ്ദിച്ചെന്ന ആരോപണവുമായി ബന്ധപ്പെട്ട വകുപ്പുതല നടപടികൾ വിശദീകരിച്ച് ആഭ്യന്തര മന്ത്രി രമേശ് ചെന്നിത്തല.
എസ്ഐടി സമർപ്പിച്ച പ്രാഥമിക റിപ്പോർട്ടിന്റെ അടിസ്ഥാനത്തിലാണ് നിലവിൽ നടപടികൾ സ്വീകരിച്ചതെന്നും, ഇതിന്റെ ഭാഗമായി മുഖ്യമന്ത്രിയുടെ ഗൺമാൻമാർ ഉൾപ്പെടെ അഞ്ച് പേരെ സസ്പെൻഡ് ചെയ്തതായും മന്ത്രി അറിയിച്ചു.
എന്നാൽ എഡിജിപി എം.ആർ. അജിത് കുമാറിനെതിരെ പ്രാഥമിക റിപ്പോർട്ടിൽ പരാമർശമില്ലെന്നും, വിശദമായ അന്വേഷണ റിപ്പോർട്ടിൽ അദ്ദേഹത്തിന്റെ പങ്ക് തെളിഞ്ഞാൽ നടപടി സ്വീകരിക്കുമെന്നും മന്ത്രി വ്യക്തമാക്കി.
അതേസമയം, കേസ് ഡയറി തിരുത്തിയെന്ന ആരോപണം സംബന്ധിച്ച് എസ്ഐടി കൂടുതൽ അന്വേഷണം തുടരുകയാണ്. ആലപ്പുഴയിലെ അന്വേഷണ ഉദ്യോഗസ്ഥരുടെയും എഡിജിപി ഓഫീസിലെ ഉദ്യോഗസ്ഥരുടെയും മൊഴികൾ രേഖപ്പെടുത്താനുള്ള നീക്കത്തിലാണ് എസ്ഐടി.
ലോക്കൽ പൊലീസ് ആദ്യം തയ്യാറാക്കിയ കേസ് ഡയറി പിന്നീട് തിരുത്തിയതാണെന്ന ആരോപണമാണ് ഉയർന്നിരിക്കുന്നത്. പ്രതിഷേധക്കാരെ മർദ്ദിച്ച സംഭവത്തെക്കുറിച്ചുള്ള വിശദ വിവരങ്ങൾ ഡയറിയിൽ ഉണ്ടായിരുന്നെങ്കിലും പിന്നീട് അത് മാറ്റിയതായി അന്വേഷണ സംഘം കണ്ടെത്തിയതായി റിപ്പോർട്ടുകൾ പറയുന്നു.
കേസുമായി ബന്ധപ്പെട്ട രേഖകളും ഡിജിറ്റൽ തെളിവുകളും പരിശോധിച്ച് വിശദമായ റിപ്പോർട്ട് ഉടൻ സമർപ്പിക്കുമെന്നാണ് വിവരം.
