ന്യൂഡൽഹി: വാണിജ്യ ആവശ്യങ്ങൾക്കുള്ള പാചകവാതക സിലിണ്ടറുകൾക്ക് പകരമായി എഥനോൾ അടിസ്ഥാനമാക്കിയുള്ള കുക്ക് സ്റ്റൗവുകൾ അവതരിപ്പിക്കാൻ സർക്കാർ നീക്കം. വാണിജ്യ എൽപിജി സിലിണ്ടറുകളുടെ വില കുത്തനെ ഉയരുന്ന സാഹചര്യത്തിൽ ഹോട്ടലുടമകൾക്കും ചെറുകിട ഭക്ഷണശാലകൾക്കും വലിയ ആശ്വാസമാകുമെന്നാണ് പ്രതീക്ഷ.
ഗ്രെയിൻ എഥനോൾ മാനുഫാക്ചറേഴ്സ് അസോസിയേഷന്റെ വിവരമനുസരിച്ച്, എഥനോൾ കുക്ക് സ്റ്റൗവുകളുടെ നിർമാണ പ്രവർത്തനങ്ങൾ പുരോഗമിക്കുകയാണ്. പദ്ധതിയുമായി ബന്ധപ്പെട്ട നിർദേശങ്ങൾ സർക്കാരിന് സമർപ്പിച്ചിട്ടുണ്ടെന്നും സംഘടന അറിയിച്ചു.
ഇറാൻ യുദ്ധത്തെ തുടർന്നുണ്ടായ ആഗോള അസംസ്കൃത എണ്ണ വിതരണ പ്രതിസന്ധിയാണ് വാണിജ്യ എൽപിജി വില വർധനയ്ക്ക് പ്രധാന കാരണമായി ചൂണ്ടിക്കാണിക്കപ്പെടുന്നത്. ഏറ്റവും പുതിയ നിരക്കുകൾ പ്രകാരം ഡൽഹിയിൽ വാണിജ്യ എൽപിജി സിലിണ്ടറിന് 42 രൂപയും കൊൽക്കത്തയിൽ 53.50 രൂപയും വർധിച്ചു. ഇതോടെ 19 കിലോഗ്രാം വാണിജ്യ സിലിണ്ടറിന്റെ വില ഡൽഹിയിൽ 3,113.50 രൂപയിലേക്കും കൊൽക്കത്തയിൽ 3,255.50 രൂപയിലേക്കും ഉയർന്നു.
വിലവർധന ഹോട്ടൽ-റസ്റ്റോറന്റ് മേഖലയെ ഗുരുതരമായി ബാധിച്ചിട്ടുണ്ട്. പ്രവർത്തനച്ചെലവ് ഉയർന്നതോടെ പല സ്ഥാപനങ്ങളും ഭക്ഷ്യവില വർധിപ്പിക്കുകയോ ഭക്ഷണത്തിന്റെ അളവ് കുറയ്ക്കുകയോ ചെയ്യുന്ന സാഹചര്യമാണ്. ചെറുകിട ഹോട്ടലുകൾക്ക് ഇത് വലിയ സാമ്പത്തിക സമ്മർദ്ദം സൃഷ്ടിച്ചിട്ടുണ്ടെന്നും ചില സ്ഥാപനങ്ങൾ അടച്ചുപൂട്ടൽ ഭീഷണി നേരിടുന്നതായും റിപ്പോർട്ടുകളുണ്ട്.
അതേസമയം, എൽപിജി വിതരണത്തിലെ അനിശ്ചിതത്വം ഭക്ഷ്യസേവന മേഖലയെ ബാധിക്കുമെന്ന ആശങ്കയും ഉയരുന്നുണ്ട്. ഈ സാഹചര്യത്തിലാണ് എഥനോൾ അധിഷ്ഠിത പാചക സംവിധാനങ്ങൾ ഒരു ബദൽ പരിഹാരമായി പരിഗണിക്കപ്പെടുന്നത്.
