മലപ്പുറം: മലപ്പുറം എടപ്പാളിൽ അപകടത്തെ തുടർന്ന് വഴിയരികിൽ നിർത്തിയിട്ടിരുന്ന കാർ ഉടമയുടെ അറിവില്ലാതെ ആക്രി വിലയ്ക്ക് വിറ്റ സംഭവത്തിൽ കൗതുകകരമായ വഴിത്തിരിവ്. വട്ടക്കുളം സ്വദേശി സിദ്ദിഖിന്റെ വാഹനമാണ് ഇത്തരത്തിൽ വിൽപ്പന നടത്തപ്പെട്ടത്.
അപകടത്തെ തുടർന്ന് തകരാറിലായ കാർ വഴിയരികിൽ പാർക്ക് ചെയ്തിരിക്കുകയായിരുന്നു. ഈ വാഹനം തന്റേതാണെന്ന് തെറ്റായി അവകാശപ്പെട്ട 21-കാരനാണ് കാർ ആക്രി കച്ചവടക്കാർക്ക് വിറ്റത്.
ഇന്നലെ വൈകിട്ട് ആറുമണിയോടെ പട്ടാമ്പിയിലെ ഒരു ആക്രി വ്യാപാരിയുടെ നേതൃത്വത്തിൽ ലോറിയും മണ്ണുമാന്തി യന്ത്രവുമായെത്തിയ സംഘം കാർ കൊണ്ടുപോകാൻ ശ്രമിച്ചു. ജെസിബി ഉപയോഗിച്ച് വാഹനം ലോറിയിലേക്ക് കയറ്റുന്നതിനിടെയാണ് സിദ്ദിഖിന്റെ കുടുംബാംഗങ്ങൾ സംഭവം ശ്രദ്ധയിൽപ്പെടുന്നത്.
വാഹനം തങ്ങളുടേതാണെന്നും വിൽപ്പന നടത്തിയിട്ടില്ലെന്നും വീട്ടുകാർ അറിയിച്ചതോടെ, മറ്റൊരാൾ ഉടമസ്ഥാവകാശം അവകാശപ്പെട്ട് കാർ തങ്ങൾക്ക് വിറ്റതാണെന്ന് ആക്രി വ്യാപാരികൾ വിശദീകരിച്ചു.
തുടർന്ന് വിവരം അറിഞ്ഞ ചങ്ങരംകുളം പൊലീസ് സ്ഥലത്തെത്തി കാർ കൊണ്ടുപോകുന്നത് തടഞ്ഞു. അന്വേഷണം നടത്തിയപ്പോൾ വാഹനം തന്റേതാണെന്ന് പറഞ്ഞാണ് യുവാവ് ഇടപാട് നടത്തിയതെന്ന് വ്യക്തമായി.
പിന്നീട് മധ്യസ്ഥ ചർച്ചകൾക്ക് ശേഷം പ്രശ്നം ഒത്തുതീർപ്പിലെത്തുകയും ഔദ്യോഗിക പരാതി നൽകാതെ വിഷയം പരിഹരിക്കപ്പെടുകയും ചെയ്തു.
