കാസർകോട്: മഴയത്ത് കുതിർന്ന് പൊട്ടിവീണ മതിലിന്റെ ചെങ്കല്ലുകൾക്കിടയിൽ ചില മിഠായി പാക്കറ്റുകൾ അറ്റുതീരാതെ കിടന്നിരുന്നു. മണ്ണിനടിയിൽ മറഞ്ഞുപോയ രണ്ട് സഹോദരങ്ങളുടെ ചെറിയ സ്വപ്നങ്ങളുടെ അവശിഷ്ടങ്ങൾ പോലെ.
മുസമ്മിലും മുൻസിറും വേനലവധിക്കാലത്ത് തുടങ്ങിയ ചെറിയ “കട”യായിരുന്നു അത്. പെലമറുവ ബസ് സ്റ്റോപ്പിനടുത്ത് ഒരു കൂറ്റൻ മതിലിനോട് ചേർന്ന് മിഠായിയും ഉപ്പിലിട്ട മാങ്ങയും വിറ്റ് അവർ ചെറിയൊരു വരുമാനം കണ്ടെത്തുകയായിരുന്നു. അവധി കഴിഞ്ഞ് സ്കൂൾ തുറന്ന ശേഷവും വൈകുന്നേരങ്ങളിൽ അവർ അവിടെ എത്തുമായിരുന്നു. ശനിയാഴ്ചയും പതിവുപോലെ ആ കടയിൽ കുട്ടികൾ ഒത്തുകൂടിയിരുന്നു. അപകടം സംഭവിക്കുന്നതിന് തൊട്ടുമുമ്പുവരെ ആറോളം കുട്ടികൾ അവിടെയുണ്ടായിരുന്നു.
അപ്പോൾ തന്നെ, പെട്ടെന്നുണ്ടായ ശക്തമായ ഇടിവിൽ മതിൽ മുഴുവനായി തകർന്നു വീണു. ഓടാൻ പോലും സമയം കിട്ടാതെ മുസമ്മിലും മുൻസിറും കല്ലിന്റെയും മണ്ണിന്റെയും അടിയിൽ കുടുങ്ങി. ശബ്ദം കേട്ട് ഓടിയെത്തിയ നാട്ടുകാർ രക്ഷാപ്രവർത്തനം ആരംഭിച്ചെങ്കിലും ഏറെ വൈകിയിരുന്നു. രക്ഷപ്പെട്ട മുഹമ്മദ് വഹീഷ് റോഡിലേക്ക് തെറിച്ചുവീണ നിലയിൽ ബോധത്തോടെയുണ്ടായിരുന്നു. അവൻ തന്നെയാണ് മറ്റു രണ്ടുകുട്ടികളും മണ്ണിനടിയിൽപ്പെട്ടതായി പറഞ്ഞത്.
“കാൽ ഭാഗം മാത്രമാണ് പുറത്തു കണ്ടത്… ശരീരം മുഴുവൻ കല്ലും മണ്ണും മൂടിയിരുന്നു…,” രക്ഷാപ്രവർത്തനത്തിന് ആദ്യം എത്തിയവരിൽ ഒരാളായ വിജീഷ് ഓർക്കുന്നു. കല്ലുകളും മണ്ണും നീക്കം ചെയ്ത് കുട്ടികളെ പുറത്തെടുത്തപ്പോഴേക്കും ജീവൻ നഷ്ടമായിരുന്നു.
അഡൂർ ജി.എച്ച്.എസ്.എസിലെ വിദ്യാർത്ഥികളായിരുന്നു ഇരുവരും. എട്ടാം ക്ലാസിൽ മുസമ്മിൽ, അഞ്ചാം ക്ലാസിൽ മുൻസിർ. ഒരാഴ്ച മുമ്പാണ് മുൻസിർ ആ സ്കൂളിൽ ചേർന്നത്. സഹോദരങ്ങൾ മാത്രമല്ല, ഏറ്റവും അടുത്ത സുഹൃത്തുക്കളുമായിരുന്നു അവർ. പഠനത്തിലും സ്കൂൾ പ്രവർത്തനങ്ങളിലും സജീവരായിരുന്ന ഇരുവരെയും അധ്യാപകരും നാട്ടുകാരും ഒരുപോലെ ഓർക്കുന്നു.
കടുത്ത മഴ മുന്നറിയിപ്പിനെ തുടർന്ന് സ്കൂളിന് അവധിയുണ്ടായിരുന്ന ദിവസമായിരുന്നു അത്. അവധിയുടെ കളിചിരികളിൽ നിന്നാണ് അവരുടെ ചെറിയ കട വീണ്ടും തുറന്നത്. എന്നാൽ ആ വൈകുന്നേരം അവസാനിച്ചത് ഒരു ദുരന്തത്തിലായിരുന്നു.
ഇപ്പോൾ അവശേഷിക്കുന്നത്, ചിതറിയ മിഠായി പാക്കറ്റുകളും ചില ചെരുപ്പുകളും മാത്രം. മഴത്തുള്ളികൾ അവയെ കഴുകിക്കളഞ്ഞാലും, ആ രണ്ട് കുട്ടികളുടെ സ്വപ്നങ്ങൾ നാടിന്റെ ഓർമ്മയിൽ നിന്ന് മായില്ല.
