ധൻബാദ്: ജാർഖണ്ഡിലെ ധൻബാദിലുള്ള ഒരു സ്കൂൾ ഹോസ്റ്റലിൽ പത്താം ക്ലാസ് വിദ്യാർഥിയെ ആറ് സഹപാഠികൾ ചേർന്ന് ക്രൂരമായി മർദ്ദിച്ച സംഭവത്തിൽ പോലീസ് കേസെടുത്ത് അന്വേഷണം ആരംഭിച്ചു. മൊബൈൽ ഫോൺ വഴിയുള്ള പണമിടപാടുമായി ബന്ധപ്പെട്ട തർക്കമാണ് ആക്രമണത്തിന് കാരണമായതെന്നാണ് പ്രാഥമിക വിവരം.
ജൂലൈ 14-ന് രാത്രിയായിരുന്നു സംഭവം. വിദ്യാർഥിയെ ബലം പ്രയോഗിച്ച് കെട്ടിയിട്ട ശേഷം വസ്ത്രങ്ങൾ അഴിച്ചുമാറ്റി ബെൽറ്റ് ഉപയോഗിച്ച് മർദ്ദിച്ചതായാണ് പരാതി. ആക്രമണത്തിന്റെ ദൃശ്യങ്ങൾ പ്രതികൾ മൊബൈൽ ഫോണിൽ പകർത്തുകയും പിന്നീട് സമൂഹമാധ്യമങ്ങളിൽ പ്രചരിപ്പിക്കുകയും ചെയ്തു. വീഡിയോ വൈറലായതോടെയാണ് സംഭവം പുറത്തറിയുന്നത്.
സംഭവം ആരോടും വെളിപ്പെടുത്തിയാൽ ഗുരുതരമായ പ്രത്യാഘാതങ്ങൾ നേരിടേണ്ടിവരുമെന്ന് പ്രതികൾ ഭീഷണിപ്പെടുത്തിയതിനാൽ ഭയന്ന വിദ്യാർഥി രണ്ട് ദിവസത്തോളം വിവരം മറച്ചുവച്ചു. എന്നാൽ, പരിക്കുകളുടെ വേദന അസഹ്യമായതോടെ കുട്ടി വീട്ടുകാരോട് സംഭവം തുറന്നുപറയുകയായിരുന്നു.
തുടർന്ന് ബന്ധുക്കൾ സ്കൂളിലെത്തി വിദ്യാർഥിയെ ആശുപത്രിയിൽ പ്രവേശിപ്പിക്കുകയും പോലീസിൽ പരാതി നൽകുകയും ചെയ്തു. ധൻബാദിലെ ഷഹീദ് നിർമ്മൽ മഹാതോ മെഡിക്കൽ കോളേജ് ആശുപത്രിയിൽ ചികിത്സയിൽ കഴിയുന്ന വിദ്യാർഥിയുടെ ആരോഗ്യനില തൃപ്തികരമാണെന്നാണ് റിപ്പോർട്ട്.
പരാതിയുടെ അടിസ്ഥാനത്തിൽ നിർസ പോലീസ് ആറ് വിദ്യാർഥികൾക്കെതിരെ കേസ് രജിസ്റ്റർ ചെയ്ത് അന്വേഷണം ആരംഭിച്ചു. മർദ്ദനം, ക്രിമിനൽ ഭീഷണിപ്പെടുത്തൽ, അശ്ലീല ദൃശ്യങ്ങൾ സമൂഹമാധ്യമങ്ങളിലൂടെ പ്രചരിപ്പിക്കൽ എന്നിവ ഉൾപ്പെടെയുള്ള കുറ്റങ്ങളാണ് ചുമത്തിയിരിക്കുന്നത്.
ഹോസ്റ്റലിനുള്ളിൽ വിദ്യാർഥിക്ക് നേരെയുണ്ടായ ഈ ആക്രമണം സ്കൂൾ അധികൃതരുടെ സുരക്ഷാ സംവിധാനങ്ങളെയും മേൽനോട്ടത്തിലെ വീഴ്ചയെയും കുറിച്ച് ഗുരുതര ചോദ്യങ്ങൾ ഉയർത്തിയിരിക്കുകയാണ്.
