ശ്രീനഗർ: ജമ്മു കശ്മീരിലെ അനന്തനാഗിൽ ഭീകരർ നടത്തിയ വെടിവെപ്പിൽ ഒരു പൊലീസുകാരൻ വീരമൃത്യു. ജമ്മു കശ്മീർ പൊലീസിലെ ഹെഡ് കോൺസ്റ്റബിൾ ആഷിഖ് ഹുസൈൻ ഖുറേഷി (35) ആണ് കൊല്ലപ്പെട്ടത്. ബുധനാഴ്ച ഉച്ചയോടെ അനന്തനാഗിലെ ലാൽ ചൗക്ക് പ്രദേശത്താണ് സംഭവം. അമർനാഥ് യാത്രയുടെ സുരക്ഷാ ഡ്യൂട്ടിയിലുണ്ടായിരുന്ന പൊലീസ് സംഘത്തിന് നേരെയാണ് ഭീകരർ വെടിയുതിർത്തത്.

പരിക്കേറ്റ ആഷിഖ് ഹുസൈൻ ഖുറേഷിയെ ഉടൻ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. ആക്രമണത്തിന്റെ ഉത്തരവാദിത്വം ലഷ്കർ-ഇ-തൊയ്ബയുമായി ബന്ധമുള്ള ദി റെസിസ്റ്റൻസ് ഫ്രണ്ട് (ടിആർഎഫ്) എന്ന ഭീകരസംഘടന ഏറ്റെടുത്തതായി റിപ്പോർട്ടുണ്ട്. സംഭവത്തിന് പിന്നാലെ അനന്തനാഗ് മേഖലയിൽ സുരക്ഷ ശക്തമാക്കി. പ്രദേശത്തിന്റെ നിയന്ത്രണം സുരക്ഷാസേന ഏറ്റെടുത്തിട്ടുണ്ട്. ആക്രമണം നടത്തിയ ഭീകരർക്കായി വ്യാപക തിരച്ചിൽ തുടരുകയാണ്.