പാലക്കാട്: തിരുവോണം ബമ്പർ ലോട്ടറിയുടെ ഒന്നാം സമ്മാനം ലഭിച്ച ഭാഗ്യശാലി താനാണെന്ന് അവകാശപ്പെട്ട് തമിഴ്നാട് സ്വദേശി പാലക്കാട് എസ്പി ഓഫീസിൽ. സാദിഖ് എന്നയാളാണ് അവകാശവാദവുമായി പൊലീസിനെ സമീപിച്ചത്.
തന്റെ കൈവശമുണ്ടായിരുന്ന യഥാർഥ ലോട്ടറി ടിക്കറ്റ് നഷ്ടപ്പെട്ടുപോയെന്നാണ് സാദിഖിന്റെ വാദം. എന്നാൽ ടിക്കറ്റിന്റെ ചിത്രം മൊബൈൽ ഫോണിൽ സൂക്ഷിച്ചിട്ടുണ്ടെന്നും ഇയാൾ പൊലീസിനെ അറിയിച്ചു.
ലോട്ടറി ടിക്കറ്റ് നഷ്ടപ്പെട്ട സാഹചര്യത്തിൽ സമ്മാനത്തുക ലഭിക്കുന്നതിനുള്ള തുടർനടപടികൾ സംബന്ധിച്ചാണ് സാദിഖ് പൊലീസിനെ സമീപിച്ചതെന്നാണ് വിവരം. ഇയാളുടെ അവകാശവാദത്തിൽ പൊലീസ് പരിശോധന നടത്തും.
തിരുവോണം ബമ്പർ ലോട്ടറിയുടെ ഒന്നാം സമ്മാനവുമായി ബന്ധപ്പെട്ട് മറ്റൊരു വ്യക്തി അവകാശവാദവുമായി രംഗത്തെത്തിയ സാഹചര്യത്തിലാണ് സാദിഖിന്റെ അവകാശവാദവും ശ്രദ്ധേയമാകുന്നത്. ടിക്കറ്റിന്റെ ആധികാരികതയും മറ്റ് രേഖകളും പരിശോധിച്ച ശേഷമായിരിക്കും യഥാർഥ ഭാഗ്യശാലിയെ സംബന്ധിച്ച അന്തിമ തീരുമാനം ഉണ്ടാകുക.
