കൊല്ലം: കേന്ദ്ര ആഭ്യന്തരമന്ത്രി അമിത് ഷായുടെ കൊല്ലം സന്ദർശനത്തിനിടെ കരിങ്കൊടി പ്രതിഷേധം. ആശ്രാമം മൈതാനത്തിന് സമീപമാണ് യൂത്ത് കോൺഗ്രസ് പ്രവർത്തകർ പ്രതിഷേധിച്ചത്. വാഹനവ്യൂഹത്തിന് മുന്നിലേക്ക് ചാടിയെത്തിയായിരുന്നു പ്രതിഷേധം. പൊലീസ് ബലം പ്രയോഗിച്ച് പ്രതിഷേധക്കാരെ നീക്കി.
ബിനു ചുള്ളിയലിന്റെ നേതൃത്വത്തിലായിരുന്നു പ്രതിഷേധമെന്നാണ് റിപ്പോർട്ട്. പ്രതിഷേധത്തിന് പിന്നാലെ യൂത്ത് കോൺഗ്രസ് പ്രവർത്തകരെ ബിജെപി പ്രവർത്തകർ കൈയേറ്റം ചെയ്യാൻ ശ്രമിച്ചതായും ആരോപണമുണ്ട്.
അമിത് ഷാ ആശ്രാമം മൈതാനത്തെ ഹെലിപ്പാഡിൽ ഇറങ്ങി വാഹനത്തിൽ യാത്ര ചെയ്യുന്നതിനിടെയാണ് പ്രതിഷേധം ഉണ്ടായത്. സന്ദർശനത്തിന്റെ ഭാഗമായി കൊല്ലം ജില്ലയിൽ പൊലീസ് കർശന സുരക്ഷയും ഗതാഗത നിയന്ത്രണങ്ങളും ഏർപ്പെടുത്തിയിരുന്നു.
കുണ്ടറയിലെ പവിത്രം കൺവെൻഷൻ സെന്ററിൽ നടക്കുന്ന ‘സഹകരണത്തിലൂടെ സമൃദ്ധി’ പരിപാടിയിലാണ് അമിത് ഷാ ആദ്യം പങ്കെടുക്കുന്നത്. തുടർന്ന് വള്ളിക്കാവിലെ മാതാ അമൃതാനന്ദമയി മഠത്തിലെത്തി ജന്മദിനാഘോഷ പരിപാടിയിലും അദ്ദേഹം പങ്കെടുക്കും.
