തിരുപ്പതി: ഒന്നരലക്ഷം രൂപയുടെ വായ്പ തിരിച്ചടയ്ക്കാത്തതിനെത്തുടർന്ന് ആറുമാസം പ്രായമുള്ള കുഞ്ഞിനെയും അമ്മയെയും വീട്ടിൽനിന്ന് ബലമായി കൊണ്ടുപോയെന്ന് പരാതി. ആന്ധ്രാപ്രദേശിലെ തോത്തമ്പേട് മണ്ഡലത്തിലെ ശിവനാഥപാലം ഗ്രാമത്തിലാണ് സംഭവം. അമ്മയെയും കുഞ്ഞിനെയും കൊണ്ടുപോയ സംഭവത്തിൽ ഭരണകക്ഷിയായ തെലുഗുദേശം പാർട്ടിക്കെതിരെയും പൊലീസിന്റെ നടപടിക്കെതിരെയും പ്രതിപക്ഷമായ വൈഎസ്ആർ കോൺഗ്രസ് രംഗത്തെത്തി. സംഭവത്തിൽ നിഷ്പക്ഷമായ അന്വേഷണം നടത്തണമെന്നും കുറ്റക്കാർക്കെതിരെ കർശന നടപടി സ്വീകരിക്കണമെന്നും പ്രതിപക്ഷം ആവശ്യപ്പെട്ടു.
ആദിയും ഭാര്യ മേഘമാലയും ഏഴുമാസം മുമ്പാണ് ശ്രീകാളഹസ്തി സ്വദേശികളായ വെങ്കടഗിരി മുനെമ്മ, പ്രസാദ്, മോഹൻ എന്നിവരുടെ കുടുംബത്തിൽനിന്ന് ഒന്നരലക്ഷം രൂപ വായ്പയെടുത്തത്. പ്രതിമാസം അഞ്ച് ശതമാനം പലിശയ്ക്കായിരുന്നു വായ്പ. മുതലും പലിശയും തിരിച്ചടയ്ക്കാൻ ആദിക്കും മേഘമാലയ്ക്കും കഴിയാതെ വന്നതോടെയാണ് തർക്കമുണ്ടായത്. തുടർന്നാണ് അമ്മയെയും കുഞ്ഞിനെയും വീട്ടിൽനിന്ന് കൊണ്ടുപോയതെന്നാണ് കുടുംബത്തിന്റെ ആരോപണം.
നവംബർ 11-ന് ആദി വീട്ടിലില്ലാത്ത സമയത്ത് പ്രസാദും മകൻ മോഹനും വീട്ടിലെത്തി. കുടിശ്ശികയായ പലിശയുടെ പേരിൽ മേഘമാലയെയും ആറുമാസം പ്രായമുള്ള കുഞ്ഞിനെയും വീട്ടിൽനിന്ന് കൂട്ടിക്കൊണ്ടുപോയെന്നാണ് കുടുംബം ആരോപിക്കുന്നത്. തുടർന്ന് മേഘമാലയുടെ ബന്ധുക്കൾ പൊലീസിനെ സമീപിച്ചു. പൊലീസിന്റെ ഇടപെടലിനെത്തുടർന്ന് അമ്മയെയും കുഞ്ഞിനെയും സുരക്ഷിതമായി തിരികെ എത്തിച്ചതായാണ് റിപ്പോർട്ടുകൾ.
എന്നാൽ, സംഭവത്തിൽ വ്യത്യസ്തമായ വിശദീകരണമാണ് പൊലീസ് നൽകുന്നത്. പലിശ തിരിച്ചടയ്ക്കാൻ സമ്മർദം ചെലുത്തിയെന്ന് മേഘമാല നൽകിയ പരാതിയിൽ പറയുന്നുണ്ടെങ്കിലും തന്നെ ബലമായി കൊണ്ടുപോയെന്നോ തടഞ്ഞുവെച്ചെന്നോ പരാതിയിൽ പരാമർശിച്ചിട്ടില്ലെന്ന് തോത്തമ്പേട് പൊലീസ് സ്റ്റേഷനിൽ മാധ്യമങ്ങളോട് സംസാരിച്ച ശ്രീകാളഹസ്തി ഡെപ്യൂട്ടി പൊലീസ് സൂപ്രണ്ട് പവനി വ്യക്തമാക്കി.
പരാതി സ്വീകരിച്ച് പൊലീസ് രസീത് നൽകിയിട്ടുണ്ട്. കേസ് രജിസ്റ്റർ ചെയ്യുന്നതിനായി പ്രാദേശിക കോടതിയുടെ അനുമതിയും തേടിയിട്ടുണ്ട്. കോടതിയുടെ അനുമതി ലഭിച്ചാൽ കേസ് രജിസ്റ്റർ ചെയ്യുമെന്നും മർദിച്ചെന്ന പരാതിയിൽ പ്രത്യേക നടപടിയെടുക്കുമെന്നും ഡിവൈ.എസ്.പി പവനി അറിയിച്ചു.
അതേസമയം, തെലുഗുദേശം പാർട്ടി നയിക്കുന്ന സർക്കാർ കുടുംബങ്ങളുടെ സുരക്ഷ ഉറപ്പാക്കുന്നതിൽ പരാജയപ്പെട്ടെന്ന് വൈഎസ്ആർ കോൺഗ്രസ് ആരോപിച്ചു. സംഭവത്തിൽ നിഷ്പക്ഷമായ അന്വേഷണം നടത്തി ഉത്തരവാദികൾക്കെതിരെ കർശന നടപടി സ്വീകരിക്കണമെന്നും പാർട്ടി ആവശ്യപ്പെട്ടു. വായ്പാ തുക തിരിച്ചുപിടിക്കുന്നതിനായി ആറുമാസം പ്രായമുള്ള കുഞ്ഞിനെപ്പോലും വീട്ടിൽനിന്ന് കൊണ്ടുപോകാൻ എങ്ങനെ കഴിയുമെന്ന് ചോദിച്ച വൈഎസ്ആർ കോൺഗ്രസ്, സംഭവത്തിൽ പൊലീസ് സ്വീകരിച്ച നടപടികളെക്കുറിച്ചും വിശദീകരണം തേടി. വായ്പ തിരിച്ചുപിടിക്കുന്നതിന്റെ പേരിൽ ഇത്തരം സമ്മർദങ്ങളും നിർബന്ധിത നടപടികളും ആവർത്തിക്കാതിരിക്കാൻ സർക്കാർ നടപടി സ്വീകരിക്കണമെന്നും പാർട്ടി ആവശ്യപ്പെട്ടു.


