ലഖ്നൗ: അയോധ്യ രാമക്ഷേത്രത്തിലെ സംഭാവനാ ക്രമക്കേട് കേസിൽ പ്രത്യേക അന്വേഷണ സംഘം (എസ്ഐടി) പ്രാഥമിക റിപ്പോർട്ട് സമർപ്പിച്ചു. ആഭ്യന്തര വകുപ്പിന്റെ അഡീഷണൽ ചീഫ് സെക്രട്ടറി സഞ്ജയ് പ്രസാദിനാണ് റിപ്പോർട്ട് നൽകിയത്.
ഇത് പ്രാഥമിക റിപ്പോർട്ടാണെന്നും അന്വേഷണം തുടരുകയാണെന്നും എസ്ഐടി അറിയിച്ചു. അടുത്ത 15 ദിവസത്തിനുള്ളിൽ അന്തിമ റിപ്പോർട്ട് സമർപ്പിക്കുമെന്ന് ലഖ്നൗ ഡിവിഷണൽ കമ്മീഷണർ വിജയ് വിശ്വാസ് പണ്ഡ് വ്യക്തമാക്കി.
സംഭാവന ഫണ്ടിന്റെ കൈകാര്യം, പണം എണ്ണൽ, ബാങ്കിലേക്ക് മാറ്റൽ എന്നിവയിൽ പങ്കെടുത്ത ഉദ്യോഗസ്ഥരുടെ വിവരങ്ങൾ റിപ്പോർട്ടിൽ ഉൾപ്പെടുത്തിയിട്ടുണ്ടെന്നാണ് വിവരം. സംഭാവനകളുടെ മേൽനോട്ടവും ബാങ്ക് ഇടപാടുകളും സംബന്ധിച്ച വിശദാംശങ്ങളും പരിശോധിച്ചതായി റിപ്പോർട്ടിൽ പറയുന്നു.
അതേസമയം, വിഷയത്തിൽ സിബിഐ അന്വേഷണം ആവശ്യപ്പെട്ട് സുപ്രീംകോടതിയിൽ ഹർജി സമർപ്പിച്ചിട്ടുണ്ട്. എഫ്ഐആർ രജിസ്റ്റർ ചെയ്യാനും കോടതി ഇടപെടണമെന്നും ഹർജിയിൽ ആവശ്യപ്പെടുന്നു. ക്ഷേത്ര ട്രസ്റ്റിന്റെ ഭരണത്തിലും പ്രവർത്തനത്തിലും നിയന്ത്രണവും ഓഡിറ്റും ഉറപ്പാക്കണമെന്ന് ഹർജിക്കാർ ആവശ്യപ്പെട്ടു. ലക്ഷക്കണക്കിന് ഭക്തരുടെ വിശ്വാസം സംരക്ഷിക്കണമെന്നും അവർ ചൂണ്ടിക്കാട്ടി. സംഭാവന ക്രമക്കേട് ആരോപണത്തിൽ ജൂൺ 13നാണ് യു.പി സർക്കാർ എസ്ഐടി അന്വേഷണത്തിന് ഉത്തരവിട്ടത്. നിലവിൽ സംഘം അന്വേഷണം തുടരുകയാണ്.
