തിരുവനന്തപുരം: ബക്രീദ് ആഘോഷത്തോടനുബന്ധിച്ച് സംസ്ഥാനത്തെ മദ്യവിൽപ്പന ശാലകൾക്കും ഒരു ദിവസത്തെ അവധി അനുവദിക്കണമെന്ന് ബെവ്കോ എംപ്ലോയീസ് സംഘം ആവശ്യപ്പെട്ടു. ബക്രീദ് ആഘോഷങ്ങളിൽ ജീവനക്കാർക്കും പങ്കെടുക്കാൻ അവസരം ലഭിക്കണമെന്ന് ചൂണ്ടിക്കാട്ടിയാണ് ഈ ആവശ്യം മുന്നോട്ടുവെച്ചത്. ഇക്കാര്യം സംബന്ധിച്ച് മുഖ്യമന്ത്രിക്ക് കത്ത് നൽകിയതായി സംഘടന അറിയിച്ചു.

സംസ്ഥാനത്ത് ബക്രീദ് ആഘോഷത്തിന് രണ്ട് ദിവസത്തെ അവധി സർക്കാർ പ്രഖ്യാപിച്ചിട്ടുണ്ട്. 27, 28 തീയതികളിലാണ് അവധി. കലണ്ടർ പ്രകാരം 27-നാണ് അവധി, എന്നാൽ സംസ്ഥാനത്ത് പ്രധാന ആഘോഷം 28-നാണെന്നും സർക്കാർ വ്യക്തമാക്കിയിട്ടുണ്ട്. അതിനാൽ 28-ന് എല്ലാ സർക്കാർ ഓഫീസുകളും പൊതുമേഖല സ്ഥാപനങ്ങളും വിദ്യാഭ്യാസ സ്ഥാപനങ്ങളും അടച്ചിടും.

ഈ സാഹചര്യത്തിലാണ് മദ്യവിൽപ്പന ശാലകൾക്കും അവധി വേണമെന്ന ആവശ്യം ഉയർന്നിരിക്കുന്നത്. വിഷയത്തിൽ സർക്കാർ തീരുമാനം പിന്നീട് വരും.