തിരുവനന്തപുരം: സംസ്ഥാനത്ത് ദേശീയ സെന്സസിന്റെ ഒന്നാം ഘട്ട പ്രവര്ത്തനങ്ങള്ക്ക് ഇന്ന് തുടക്കമാകും. ആദ്യഘട്ടമായ ഭവന സെന്സസാണ് ഈ മാസം മുപ്പത് വരെ നടക്കുക. വീടുകളുടെ കൃത്യമായ പട്ടിക തയ്യാറാക്കുന്നതിനൊപ്പം ജനങ്ങളുടെ അടിസ്ഥാന സൗകര്യങ്ങളെക്കുറിച്ചുള്ള സമഗ്രമായ വിവരശേഖരണവുമാണ് ഈ ഘട്ടത്തില് പ്രധാനമായും നടക്കുക.
ഓണ്ലൈനായുള്ള എന്യൂമറേഷന് നടപടികള്ക്കുള്ള അവസാന തിയതി ഇന്നലെ പൂര്ത്തിയായിരുന്നു. ഇന്ന് മുതല് ഭവന സെന്സസിന്റെ ഭാഗമായി എന്യൂമറേറ്റര്മാര് വീടുകളിലെത്തും. 33 ചോദ്യങ്ങളിലൂടെയാണ് എന്യൂമനേറ്റര്മാര് വിവരങ്ങള് തേടുക. വീടുകളുടെ നിലവിലെ അവസ്ഥ, കുടുംബങ്ങള്ക്ക് ലഭ്യമായിട്ടുള്ള കുടിവെള്ളം, വൈദ്യുതി ഉള്പ്പെടെയുള്ള അടിസ്ഥാന സൗകര്യങ്ങള്, നിലവിലുള്ള ആസ്തികള് എന്നിവയെക്കുറിച്ചുള്ള വിവരങ്ങളാണ് ശേഖരിക്കുന്നത്.
ഇതിനായി 61,282 എന്യൂമറേറ്റര്മാരെയും അവരുടെ പ്രവര്ത്തനങ്ങള്ക്ക് മേല്നോട്ടം വഹിക്കുന്നതിനായി 10,189 സൂപ്പര്വൈസര്മാരെയും പ്രത്യേകമായി നിയോഗിച്ചിട്ടുണ്ട്. സെന്സസിന്റെ ഏറ്റവും പ്രധാനപ്പെട്ട രണ്ടാം ഘട്ടമായ ജനസംഖ്യാ കണക്കെടുപ്പ് 2027 ഫെബ്രുവരിയിലായിരിക്കും നടക്കുക.
