തിരുവനന്തപുരം: കെപിസിസി യോഗത്തിൽ സംസ്ഥാന സർക്കാരിനെതിരെ വിമർശനം. മുഖ്യമന്ത്രിയും മന്ത്രിമാരും കോൺഗ്രസ് നേതാക്കളെ വേണ്ടത്ര പരിഗണിക്കുന്നില്ലെന്ന് തൃശൂർ ഡിസിസി അധ്യക്ഷൻ യോഗത്തിൽ വിമർശിച്ചു. മുഖ്യമന്ത്രി കൂടുതൽ ജനകീയനാകണമെന്നും പ്രധാന തസ്തികകളിലെ നിയമനങ്ങളിൽ ശ്രദ്ധ പുലർത്തണമെന്നും നേതാക്കൾ ആവശ്യപ്പെട്ടു.
പിഎം ശ്രീ പദ്ധതി സംസ്ഥാനത്ത് നടപ്പാക്കരുതെന്നും യോഗത്തിൽ നേതാക്കൾ ആവശ്യപ്പെട്ടു. പദ്ധതിയെക്കുറിച്ച് പൊതുസമൂഹത്തെ ബോധ്യപ്പെടുത്താൻ കഴിയില്ലെന്നും നേതാക്കൾ ചൂണ്ടിക്കാട്ടി.
എന്നാൽ പദ്ധതിയിൽ അന്തിമ തീരുമാനം എടുത്തിട്ടില്ലെന്ന് മുഖ്യമന്ത്രി യോഗത്തിൽ വ്യക്തമാക്കി. കരിക്കുലത്തിൽ ഇടപെടാൻ കേന്ദ്രസർക്കാരിനെ അനുവദിക്കില്ലെന്നും മുഖ്യമന്ത്രി പറഞ്ഞു. കെപിസിസി ഭാരവാഹികൾക്ക് ഏത് സമയത്തും തന്നെയും മന്ത്രിമാരെയും കാണാമെന്നും അദ്ദേഹം വ്യക്തമാക്കി.
അതിനിടെ, കെപിസിസി യോഗത്തിലേക്ക് ക്ഷണിക്കാത്തതിൽ കേരളത്തിന്റെ ചുമതലയുള്ള എഐസിസി ജനറൽ സെക്രട്ടറി ദീപാദാസ് മുൻഷിക്ക് അതൃപ്തിയുണ്ടെന്നാണ് വിവരം. രാഷ്ട്രീയകാര്യസമിതിയിൽ സർക്കാരിനെ വിമർശിച്ചതിന് പിന്നാലെയാണ് അവരെ യോഗത്തിലേക്ക് ക്ഷണിക്കാത്തതെന്ന ചർച്ചയും ഉയർന്നിട്ടുണ്ട്.
വിഷയത്തിൽ കെപിസിസി അധ്യക്ഷൻ സണ്ണി ജോസഫിനോട് ദീപാദാസ് മുൻഷി അതൃപ്തി അറിയിച്ചേക്കുമെന്നാണ് സൂചന. അതേസമയം, വിഷയത്തിൽ പ്രതികരിക്കാൻ സണ്ണി ജോസഫ് തയ്യാറായില്ല. എല്ലാ യോഗങ്ങളിലേക്കും ദീപാദാസ് മുൻഷിയെ സാധാരണയായി ക്ഷണിക്കാറുണ്ടെന്നും ഇത്തവണ ക്ഷണിച്ചില്ലേയെന്ന് അറിയില്ലെന്നും ദീപ്തി മേരി വർഗീസ് പ്രതികരിച്ചു.
ചിറയിൻകീഴ് കയ്യാങ്കളി വിവാദത്തിൽ രമ്യാ ഹരിദാസ് എംഎൽഎയ്ക്കെതിരെയും കെപിസിസി യോഗത്തിൽ രൂക്ഷ വിമർശനം ഉയർന്നു. പാർട്ടിക്ക് നാണക്കേടുണ്ടാക്കിയ സംഭവത്തിൽ കടുത്ത നടപടി സ്വീകരിക്കണമെന്ന് ഒരു വിഭാഗം നേതാക്കൾ ആവശ്യപ്പെട്ടു.
വിവാദം പാർട്ടിയുടെ സൽപ്പേരിന് കളങ്കമുണ്ടാക്കിയെന്നും നേതാക്കൾ ചൂണ്ടിക്കാട്ടി. ഇതോടെ രമ്യാ ഹരിദാസിനെതിരെ അച്ചടക്ക നടപടി സ്വീകരിക്കാൻ കെപിസിസി നിർബന്ധിതമായേക്കും.
നിലവിൽ കെപിസിസി ഉപാധ്യക്ഷയാണ് രമ്യാ ഹരിദാസ്. അന്വേഷണ സമിതി റിപ്പോർട്ടും നേതാക്കളുടെ അഭിപ്രായങ്ങളും പരിഗണിച്ച് രമ്യയെ ചുമതലയിൽനിന്ന് നീക്കണമെന്ന് എഐസിസിയോട് ആവശ്യപ്പെടാനുള്ള സാധ്യതയും നേതൃത്വത്തിന്റെ പരിഗണനയിലുണ്ട്.
