ന്യൂഡൽഹി: ഡൽഹിയിൽ കോക്റോച്ച് ജനതാ പാർട്ടി (സിജെപി) നടത്തുന്ന പ്രതിഷേധം വെറുമൊരു പരാജയപ്പെട്ട പ്രകടനമാണെന്ന് ബിജെപി ദേശീയ വക്താവും എംപിയുമായ സംബിത് പത്ര. വ്യാജവാർത്തകൾ പ്രചരിപ്പിച്ചും അക്രമസംഭവങ്ങളിലൂടെ അരാജകത്വം സൃഷ്ടിച്ചും പ്രതിപക്ഷം നടത്തിയ ശ്രമങ്ങൾ പരാജയപ്പെട്ടുവെന്നും ഇത് അരാജകത്വത്തിന് മേൽ ജനാധിപത്യം നേടിയ വിജയമാണെന്നും അദ്ദേഹം അവകാശപ്പെട്ടു.
റെജിനഗറിൽ 1,109 രജിസ്റ്റർ ചെയ്ത വോട്ടർമാരുണ്ടെന്ന് ചീഫ് ഇലക്ടറൽ ഓഫീസർ വ്യക്തമാക്കിയിട്ടും 772 വോട്ടർമാർ മാത്രമാണുള്ളതെന്ന വ്യാജപ്രചാരണം പ്രതിപക്ഷ നേതാക്കൾ തുടർന്നുവെന്ന് സംബിത് പത്ര ആരോപിച്ചു. ഇലക്ട്രോണിക് വോട്ടിങ് യന്ത്രങ്ങളിൽ അട്ടിമറി നടത്താനാകുമെന്ന് തെളിയിക്കാൻ തിരഞ്ഞെടുപ്പ് കമ്മീഷൻ സംഘടിപ്പിച്ച ഹാക്കത്തോണിലേക്ക് പ്രതിപക്ഷത്തെ ക്ഷണിച്ചെങ്കിലും അവർ പങ്കെടുത്തില്ലെന്നും അദ്ദേഹം കുറ്റപ്പെടുത്തി.
രാഷ്ട്രപതിയെ സന്ദർശിച്ച കോൺഗ്രസ് നേതാവ് രാഹുൽ ഗാന്ധിയെയും സംബിത് പത്ര വിമർശിച്ചു. രാഷ്ട്രപതിക്ക് നിവേദനം സമർപ്പിക്കുമ്പോൾ പാലിക്കേണ്ട അടിസ്ഥാന ഭരണഘടനാ പ്രോട്ടോക്കോൾ പോലും രാഹുൽ ഗാന്ധിക്ക് അറിയില്ലെന്ന് അദ്ദേഹം ആരോപിച്ചു. തിരഞ്ഞെടുപ്പ് ക്രമക്കേടുകൾ ആരോപിക്കുമ്പോൾ അതിന് തെളിവുകൾ നിവേദനത്തോടൊപ്പം സമർപ്പിക്കാതിരുന്നത് എന്തുകൊണ്ടാണെന്നും സംബിത് പത്ര ചോദിച്ചു. രാഷ്ട്രപതിയുടെ ഓഫീസിനെ രാഷ്ട്രീയ തർക്കങ്ങളിലേക്ക് വലിച്ചിഴച്ച പ്രതിപക്ഷം, ഇലക്ട്രോണിക് വോട്ടിങ് യന്ത്രങ്ങളിലെ ക്രമക്കേടുകൾക്കെതിരെ നീതി തേടി സുപ്രീം കോടതിയെ സമീപിക്കുന്നതിന് പകരം പ്രതിഷേധ സ്ഥലങ്ങളിലെ ശുചിമുറി, വൈദ്യസഹായം തുടങ്ങിയ സൗകര്യങ്ങൾക്കായാണ് കോടതിയെ സമീപിച്ചതെന്നും അദ്ദേഹം പരിഹസിച്ചു.
അതേസമയം, മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് ഡൽഹിയിൽ പ്രതിഷേധിക്കാനെത്തിയ സിജെപി സ്ഥാപകൻ അഭിജീത് ദിപ്കെയെയും പാർട്ടി നേതാക്കളായ സൗരവ് ദാസ്, അശുതോഷ് റാങ്ക എന്നിവരെയും വിമാനം ഇറങ്ങിയ ഉടൻ ഡൽഹി പൊലീസ് കസ്റ്റഡിയിലെടുത്തു. കസ്റ്റഡിയിലാകാൻ സാധ്യതയുണ്ടെന്ന് മുൻകൂട്ടി കണ്ട് അഭിജീത് ദിപ്കെ പുറത്തുവിട്ട വീഡിയോ സന്ദേശത്തിൽ പാർട്ടിയുടെ സംഘടനാ ചുമതലയുള്ള അജിങ്ക്യ ഷിൻഡെ പ്രതിഷേധത്തിന് നേതൃത്വം നൽകുമെന്ന് അറിയിച്ചിരുന്നു. ഡൽഹിയിൽ കസ്റ്റഡിയിലായ നേതാക്കളെ മോചിപ്പിക്കുന്നതുവരെ അജിങ്ക്യ ഷിൻഡെയുടെ നേതൃത്വത്തിൽ സമരം തുടരാനാണ് സിജെപിയുടെ തീരുമാനം.
