തിരുവനന്തപുരം: കാലവർഷക്കെടുതിയെ തുടർന്നുള്ള രക്ഷാപ്രവർത്തനത്തിലെ വീഴ്ചയിൽ സംസ്ഥാന സർക്കാരിനും മുഖ്യമന്ത്രി വി ഡി സതീശനുമെതിരെ രൂക്ഷ വിമർശനവുമായി പ്രതിപക്ഷ നേതാവ് പിണറായി വിജയൻ. മഴ മാറിയെങ്കിലും ദുരന്തബാധിതരുടെ ദുരിതം തുടരുകയാണെന്ന് അദ്ദേഹം പറഞ്ഞു.
പ്രകൃതിദുരന്തങ്ങളിൽപ്പെട്ടവർ നിരാലംബരാകുന്ന സാഹചര്യം ഉണ്ടാകരുതെന്നും തീരദേശ മേഖലകളിൽ ഉൾപ്പെടെ അടിയന്തര സഹായം ഉറപ്പാക്കണമെന്നും പിണറായി വിജയൻ ആവശ്യപ്പെട്ടു. ഭരണനേതൃത്വത്തിൽ നിന്നുള്ള ചില പരാമർശങ്ങൾ അതിരുകടന്നതായും അദ്ദേഹം വിമർശിച്ചു. മുഖ്യമന്ത്രിയുടെ ചില പ്രസ്താവനകൾ തീരദേശവാസികളെ വൈകാരികമായി പ്രകോപിപ്പിച്ചെന്നും അവഹേളിക്കപ്പെട്ടുവെന്ന തോന്നലിലേക്ക് അവരെ എത്തിച്ചെന്നും പിണറായി വിജയൻ ആരോപിച്ചു.
മത്സ്യത്തൊഴിലാളികൾ അപകടത്തിൽപ്പെട്ട നിർണായക സമയത്ത് രക്ഷാപ്രവർത്തന ഏകോപനത്തിൽ വലിയ വീഴ്ചയുണ്ടായെന്നും അദ്ദേഹം പറഞ്ഞു. ഇത്തരം സാഹചര്യങ്ങളിൽ അടിയന്തരമായി ഇടപെടേണ്ട വകുപ്പുകൾ എന്തുകൊണ്ട് സമയത്ത് പ്രവർത്തിച്ചില്ലെന്നും അദ്ദേഹം ചോദിച്ചു.
ദുരന്തബാധിതർക്ക് ആവശ്യമായ സഹായം നൽകുന്നതിൽ സർക്കാരിന്റെ സാന്നിധ്യക്കുറവും അനാസ്ഥയും ഗുരുതരമായ പ്രശ്നമാണെന്നും പിണറായി വിജയൻ പറഞ്ഞു. ദുരന്തം നടന്ന് പത്ത് ദിവസത്തിന് ശേഷമാണ് മന്ത്രിമാർ സ്ഥലം സന്ദർശിച്ചതെന്നും ഇത് സർക്കാരിന്റെ ഗുരുതരമായ വീഴ്ചയാണെന്നും അദ്ദേഹം ആരോപിച്ചു.
മുൻ സർക്കാർ നടപ്പാക്കിയ ദുരിതാശ്വാസ പ്രവർത്തനങ്ങൾ തുടർന്നാൽ നിലവിലെ പ്രതിസന്ധി ഒരു പരിധിവരെ പരിഹരിക്കാനാകുമെന്നും അദ്ദേഹം പറഞ്ഞു. ദുരന്തബാധിത കുടുംബങ്ങളിലെ ഒരാൾക്കെങ്കിലും സർക്കാർ ജോലി നൽകുന്നത് പരിഗണിക്കണമെന്നും പിണറായി വിജയൻ ആവശ്യപ്പെട്ടു.
കടലിൽ കാണാതായ മത്സ്യത്തൊഴിലാളി ജോണിന്റെ മകൾ ജിജിക്കെതിരായ സൈബർ ആക്രമണത്തെയും അദ്ദേഹം അപലപിച്ചു. യുഡിഎഫ് അനുകൂലികളെന്ന് പറയപ്പെടുന്ന ചിലർ ക്വട്ടേഷൻ സംഘങ്ങളെപ്പോലെയാണ് പെരുമാറുന്നതെന്നും അദ്ദേഹം ആരോപിച്ചു. അനീതിക്കെതിരെ പ്രതികരിച്ച പെൺകുട്ടിക്കെതിരെ സൈബർ ആക്രമണം നടത്തിയവർക്കെതിരെ സർക്കാർ നടപടി സ്വീകരിക്കാത്തത് എന്തുകൊണ്ടാണെന്നും പിണറായി വിജയൻ ചോദിച്ചു.
