തിരുവനന്തപുരം: തിരഞ്ഞെടുപ്പിലെ കനത്ത തോൽവിക്ക് പിന്നാലെ സംഘടനാപരമായ മാറ്റങ്ങൾ കൊണ്ടുവരാൻ സിപിഎം ഒരുങ്ങുന്നു. പാർട്ടിക്ക് സംഭവിച്ച വീഴ്ചകളും ആവശ്യമായ തിരുത്തൽ നടപടികളും ചർച്ച ചെയ്യാൻ സെപ്റ്റംബർ രണ്ടാംവാരം കോഴിക്കോട് വിശാല സംസ്ഥാന കമ്മിറ്റി യോഗം ചേരും.
സംസ്ഥാന കമ്മിറ്റി അംഗങ്ങൾക്കൊപ്പം ജില്ലാ സെക്രട്ടേറിയറ്റ് അംഗങ്ങളും പോഷക സംഘടനാ ഭാരവാഹികളും യോഗത്തിൽ പങ്കെടുക്കും. പാർട്ടിയുടെ പ്രവർത്തന രീതിയിലും നേതാക്കളുടെ സമീപനത്തിലും മാറ്റം വേണമെന്ന ആവശ്യം വിവിധ തലങ്ങളിൽ നിന്നുയർന്നിരുന്നു.
തുടർഭരണം പാർട്ടിയെ ദുർബലമാക്കിയെന്നും സാധാരണക്കാരിൽ നിന്ന് അകലം വർധിച്ചെന്നും പാർട്ടി വിലയിരുത്തുന്നു. നേതാക്കളുടെ പെരുമാറ്റത്തിലും പ്രവർത്തന രീതിയിലും തിരുത്തൽ ആവശ്യമാണെന്ന അഭിപ്രായം ബ്രാഞ്ച് തലത്തിൽ നിന്ന് കേന്ദ്ര കമ്മിറ്റി വരെ നടന്ന അവലോകന ചർച്ചകളിൽ ഉയർന്നിരുന്നു.
കഴിഞ്ഞ ആഴ്ച ചേർന്ന പ്രത്യേക കേന്ദ്ര കമ്മിറ്റി യോഗത്തിൽ തിരുത്തേണ്ട കാര്യങ്ങളുടെ കരട് തയ്യാറാക്കിയിട്ടുണ്ട്. ഇതിന്റെ അടിസ്ഥാനത്തിലായിരിക്കും വിശാല സംസ്ഥാന കമ്മിറ്റി യോഗത്തിലെ ചർച്ചകളും തീരുമാനങ്ങളും ഉണ്ടാകുക. സംസ്ഥാനത്തെ പാർട്ടിയിൽ വിഭാഗീയതയ്ക്ക് സമാനമായ ചേരിതിരിവ് ശക്തമായതായും വിലയിരുത്തലുണ്ട്. നേതൃമാറ്റം വേണമെന്ന ആവശ്യവും ചില പ്രവർത്തകരിൽ നിന്ന് ഉയരുന്നുണ്ട്.
സംസ്ഥാന സെക്രട്ടറി എം.വി. ഗോവിന്ദനെതിരെയും വിമർശനങ്ങൾ ഉയർന്നിട്ടുണ്ട്. അതേസമയം, നിയമസഭയിൽ പ്രതിപക്ഷത്തിന്റെ പ്രവർത്തന രീതിയിലും പാർട്ടിക്കുള്ളിൽ അതൃപ്തിയുണ്ടെന്നാണ് റിപ്പോർട്ട്. പ്രതിപക്ഷത്തെ കൂടുതൽ ശക്തമായി നയിക്കാൻ പുതിയ സമീപനം ആവശ്യമാണെന്നും അഭിപ്രായമുണ്ട്. ഇതിനിടെ ബംഗാളിലും സി.പി.എം. വിശാല സംസ്ഥാന കമ്മിറ്റി യോഗം വിളിക്കാൻ തീരുമാനിച്ചിട്ടുണ്ട്.
