കോട്ടയം: എസ്.എം.എസ്.എം പബ്ലിക് ലൈബ്രറിയുടെ ആഭിമുഖ്യത്തിൽ സംഘടിപ്പിച്ച 2026-ലെ ബാലകലോത്സവ വിജയികൾക്കുള്ള പുരസ്കാര വിതരണവും സാംസ്കാരിക സമ്മേളനവും ലൈബ്രറി ഹാളിൽ നടന്നു. നഗരസഭ കൗൺസിലർ രശ്മി ശ്യാം സാംസ്കാരിക സമ്മേളനം ഉദ്ഘാടനം ചെയ്തു. കലോത്സവത്തിൽ ഏറ്റവും കൂടുതൽ പോയിന്റുകൾ നേടി ഒന്നാം സ്ഥാനം കരസ്ഥമാക്കിയ കട്ടച്ചിറ മേരി മൗണ്ട് പബ്ലിക് സ്കൂൾ ആൻഡ് ജൂനിയർ കോളജിന് എവർറോളിംഗ് ട്രോഫിയും കുട്ടികൾക്കുള്ള അവാർഡുകളും രശ്മി ശ്യാം വിതരണം ചെയ്തു.
അതിരമ്പുഴ സെന്റ് അലോഷ്യസ് എൽ.പി സ്കൂൾ രണ്ടാം സ്ഥാനത്തിന് അർഹരായി. വെട്ടിമുകൾ സെൻ്റ് പോൾ സ്കൂളിന് ചടങ്ങിൽ പ്രത്യേക അവാർഡ് നൽകി ആദരിച്ചു. ലൈബ്രറി പ്രസിഡന്റ് ജി. പ്രകാശ് അധ്യക്ഷത വഹിച്ച യോഗത്തിൽ പ്രമുഖ വ്യക്തിത്വങ്ങൾ പങ്കെടുത്തു. ലളിതകലാ അക്കാദമി അവാർഡ് ജേതാവ് ടി.എസ്. പ്രസാദ്, എഴുത്തുകാരി കെ.എസ്. ജയലക്ഷ്മി, ഡോക്ടർ വി.ആർ. ജയചന്ദ്രൻ, അഡ്വക്കേറ്റ് രാജീവ് ചിറയിൽ എന്നിവർ ചടങ്ങിൽ സംസാരിച്ചു. വായനശാലയുടെയും കലാപ്രവർത്തനങ്ങളുടെയും പ്രാധാന്യം വിളിച്ചോതുന്നതായിരുന്നു സംഘടിപ്പിക്കപ്പെട്ട സാംസ്കാരിക സമ്മേളനം.
